দুবছৰৰ মূৰে মূৰে প্ৰকাশ পোৱা ইণ্ডিয়া ষ্টেট অফ ফৰেষ্টৰ প্ৰতিবেদনত নাগালেণ্ডত যোৱা দুবছৰত ২.৫ শতাংশ বনাঞ্চল হ্ৰাস পোৱা বুলি প্ৰকাশ পাইছে। প্ৰতিবেদনখনত যোৱা ২০১৫ চনৰ তথ্যক ভিত্তি হিচাপে দেখুওৱা হৈছে।
বনাঞ্চল হ্ৰাস পোৱাৰ অন্যতম কাৰণ স্থানান্তৰমূলক কৃষি পদ্ধতি বা ঝুমখেতি, উন্নয়নমূলক কামকাজ আৰু জৈৱিক উপাদানৰ বিস্তাৰণ বুলি কোৱা হৈছে।
প্ৰতিবেদনটো মতে সৰ্বাধিক হ্ৰাস পাইছে ‘মুক্ত বনাঞ্চল’ (Open Forest) শ্ৰেণীৰ বনাঞ্চল, যাৰ পৰিমাণ হ’ল ২০১৫ চনৰ পৰা ৩৪২ বৰ্গ কিলোমিটাৰ।
আনহাতে মধ্যমীয়া ঘনত্বৰ বনাঞ্চল (Medium Dense Forests) হ্ৰাস পাইছে ১০৩ বৰ্গ কিলোমিটাৰ আৰু অতি ঘন বনাঞ্চল (Very Dense Forests) হ্ৰাস পাইছে ৫ বৰ্গ কিলোমিটাৰ।
যদিহে জোপোহানিৰে ভৰা অঞ্চলক এই হিচাপত ধৰা যায়, যাৰ হ্ৰাস পোৱা পৰিমাণ হ’ল ১১৪ বৰ্গ কিলোমিটাৰ, মুঠ বনভূমি হ্ৰাসৰ পৰিমাণ আৰু বাঢ়িব। তেতিয়া ২০১৫ চনৰ তুলনাত মুঠ হ্ৰাস হ’ব ৫৬৪ বৰ্গ কিলোমিটাৰ।
উল্লেখযোগ্য যে ৰাজ্যখনত বৰ্তমান থকা মুঠ বনভূমি হ’ল অতি ঘন বনভূমি ১২৭৯ বৰ্গ কিলোমিটাৰ, মধ্যমীয়া ঘনত্বৰ বনভূমি ৪৬৮৭ বৰ্গ কিলোমিটাৰ, মুক্ত বনাঞ্চল ৬৬২৩ বৰ্গ কিলোমিটাৰ, জোপোহানিৰে আবৃত বনাঞ্চল হ’ল ৫০৩ বৰ্গ কিলোমিটাৰ। ৰাজ্যখনৰ মুঠ বনাঞ্চল মুঠ মাটিকালিৰ ৭৫.৩৩ শতাংশ।
আনহাতে প্ৰতিবেদন মতে নাগালেণ্ডৰ লগতে মিজোৰাম (৫৩১ বৰ্গ কিলোমিটাৰ), অৰুণাচল প্ৰদেশ (১৯০ বৰ্গ কিলোমিটাৰ), ত্ৰিপুৰা (১৬৪ বৰ্গ কিলোমিটাৰ) আৰু মেঘালয়ৰো (১১৬ বৰ্গ কিলোমিটাৰ) বনাঞ্চল হ্ৰাস পাইছে। ইয়াৰ বিপৰীতে অসমৰ বনাঞ্চল সামান্যভাৱে যোৱা দুবছৰত বাঢ়িছে।
