নাগালেণ্ডৰ মুখ্য নিৰ্বাচনী বিষয়া অভিজিত চিনহাই আজি ৰাজ্যখনৰ মন্ত্ৰী, সংসদীয় সচিব, উপদেষ্টা আৰু অন্যান্য ৰাজনৈতিক নেতাসকলক দিয়া বাহনসমূহ তৎকালে বাতিল কৰিবলৈ সকলো বিভাগকে নিৰ্দেশ দিয়ে। ১৮ জানুৱাৰিৰ পৰা বলবৎ হোৱা নিৰ্বাচনী আচৰণ বিধিৰ অধীনত এই নিৰ্দেশ দিয়া হৈছে।
এই সন্দৰ্ভত তেওঁ ক’হিমাৰ সচিবালয় সভাঘৰত বিভিন্ন বিভাগৰ মুৰব্বী আৰু অতিৰিক্ত মুৰব্বীসকলৰ সৈতে এক বৈঠকত মিলিত হয়।
বৈঠকখনত তেওঁ স্পষ্ট কৰি দিয়ে যে পৰিৱহণ বিভাগে যোগান ধৰা বিভাগী্য় বাহনসমূহ কেৱল বিভাগীয় কামৰ বাবেহে মন্ত্ৰী, সংসদীয় সচিব, উপদেষ্টা আদিয়ে ব্যৱহাৰ কৰিব পাৰিব। তেওঁলোকৰ নিৰ্বাচনী কাম-কাজৰ বাবে এই বাহনসমূহ ব্যৱহাৰ কৰিব নোৱাৰিব।
মুখ্য নিৰ্বাচনী বিষয়াগৰাকীয়ে লগতে কয় যে কোনো ব্যক্তিয়ে এনে বাহন ঘূৰাই নিদিলে প্ৰয়োজনীয় ব্যৱস্থা গ্ৰহণৰ বাবে বিষয়টো আয়োগৰ দৃষ্টিগোচৰ কৰিব লাগিব।
বৈঠকখনত তেওঁ চৰকাৰী চাকৰিয়ালসকলৰ আদৰ্শ আচৰণবিধি সম্পৰ্কেও বিস্তৃত বক্তব্য ৰাখে।
আনহাতে নিৰ্বাচনত কৰ্তব্যৰত সকলো কৰ্মী আৰু কেন্দ্ৰীয় সশস্ত্ৰ আৰক্ষী বাহিনীৰ লোকসকলে ৰাজ্যৰ স্বাস্থ্য আৰু পৰিয়াল কল্যাণ বিভাগৰ সকলো ৰাজহুৱা স্বাস্থ্য সেৱাৰ ক্ষেত্ৰতে ধনহীন চিকিৎসা পাব বুলি বিভাগটোৱে এক জাননী জাৰি কৰিছে।
আজি জাৰি কৰা এই নিৰ্দেশটোৰ জৰিয়তে বিভাগটোৱে ৰাজহুৱা স্বাস্থ্য সেৱাত কৰ্মৰত সকলো কৰ্মচাৰীকে এই ক্ষেত্ৰত প্ৰয়োজনীয় ব্যৱস্থা গ্ৰহণ কৰিবৰ বাবে নিৰ্দেশ দিয়ে।
নিৰ্দেশটোত লগতে কোৱা হৈছে যে কেন্দ্ৰীয় সশস্ত্ৰ আৰক্ষী বাহিনীৰ লোকসকলে ৰাজ্যখনৰ নিৰ্বাচনী কৰ্তব্যত যোগদান কৰাৰ পৰা কৰ্তব্যৰপৰা আজৰি হোৱালৈকে এই সুবিধা পাব।
এইক্ষেত্ৰত সুচিকিৎসা নিশ্চিত কৰাৰ লগতে যিকোনো ধৰণৰ জৰুৰী চিকিৎসাৰ বাবেও প্ৰস্তুত থাকিবলৈ নিৰ্দেশ দিয়া হৈছে।
জাননীখনত লগতে সকীয়াই দিয়া হৈছে যে কৰ্তব্যত গাফিলতি কৰাৰ বাবে উদয় হোৱা যিকোনো পৰিস্থিতিৰ বাবে সংশ্লিষ্ট কৰ্মচাৰীজন জগৰীয়া হ’ব।
