নুৰুদ্দিন আহমেদ ট্ৰফী ছিনিয়ৰ আন্তঃজিলা ক্ৰিকেটৰ কোৱাৰ্টাৰ ফাইনেল লীগৰ দুদিনীয়া মেচত যোৰহাটৰ বিৰুদ্ধে শক্তিশালী স্থিতিত উপনীত হৈছে বঙাইগাঁও জিলা ক্ৰিকেট দল।
মঙলদৈ ষ্টেডিয়ামত শুকুৰবাৰৰ পৰা আৰম্ভ হোৱা মেচখনত যোৰহাট দলে প্ৰথমে বেট ধৰি ৪৭.৩ অভাৰত মাত্ৰ ১২২ ৰানতে সকলো উইকেট হেৰুৱাই বিপদৰ সন্মুখীন হৈছে। দলটোৰ হৈ একমাত্ৰ মহম্মদ আৰিফে বিপক্ষৰ বিৰুদ্ধে যুজ দি ৪০ ৰানৰ বৰঙণি আগবঢ়ায়।
আনহাতে বঙাইগাঁৱৰ এই সাফল্যৰ আঁৰৰ খেলুৱৈগৰাকী হৈছে পল্লৱ দাস। পল্লৱে মেচখনৰ আৰম্ভণিৰ পৰাই ক্ষুৰধাৰ বলিঙ কৰি যোৰহাটৰ প্ৰাৰম্ভিক পৰ্যায়ৰ তিনিজলকৈ খেলুৱৈক পেভেলিয়নৰ ৰাস্তা দেখুৱায় যোৰহাটক শলঠেকত পেলায়। ইয়াৰ উপৰি কন ওৰাং আৰু প্ৰিতম তালুকদাৰেও দুটাকৈ উইকেট লাভ কৰে।
ইফালে প্ৰত্যুত্তৰত বঙাইগাঁৱে ৩২ অভাৰত ৫ টা উইকেট হেৰুৱাই সংগ্ৰহ কৰে ১৪১ ৰান। দলৰ হৈ পাৰ্থজিৎ বৈশ্য আৰু সুজয় তৰফদাৰে দিনান্তৰ শেষলৈকে ক্ৰমে ৬২ আৰু ৩০ ৰান কৰি অপৰাজিত হৈ থাকে।
যোৰহাটৰ হৈ একমাত্ৰ দয়াল কৃষ্ণ দত্তই(২/২৭) বিপক্ষৰ বেটছমেনক অসুবিধাৰ সন্মুখীন কৰিছিল যদিও পাছলৈ বঙাইগাঁৱে মেচখনত নিজৰ স্থিতি মজবুত কৰিবলৈ সক্ষম হয়।
