ৰাজ্যখনত হাতী-মানুহৰ সংঘাতে গুৰুতৰ ৰূপ ধাৰণ কৰাৰ সময়তে পশ্চিম কাৰ্বি আংলঙৰ পৰা আন এক বনৰীয়া হাতীৰ উপদ্ৰৱৰ খবৰ পোৱা গৈছে। প্ৰাপ্ত খবৰ অনুসৰি বুধবাৰে নিশা খেৰণিৰ ২ নম্বৰ হাজাগাফাৰ গাৱঁত বনৰীয়া হাতীয়ে তাণ্ডৱ চলাই পাঁচটাকৈ পৰিয়ালৰ বাসগৃহ ভাঙি লণ্ডভণ্ড কৰে। নিশা প্ৰায় ২-৩০ বজাত ২০-২৫ জনীয়া এটা বনৰীয়া হাতীৰ জাকে চলোৱা উক্ত আক্ৰমণত কোনো লোক হতাহত হোৱা নাই যদিও জাকটোৱে গাওঁখনৰ বাসিন্দা ললিতা জহৰী, দেৱ দাস,অজিত গিৰিছা, কমিতা দাওদোংলাংথা, অজয় দিব্ৰাৰ বাসগৃহ, ধান ভঁৰাল আদি ভাঙি লণ্ডভণ্ড কৰাৰ লগতে ঘৰৰ বয়-বস্তু ভাঙি বিনষ্ট কৰে। উল্লেখযোগ্য যে যোৱা কিছুদিনৰ পৰা পশ্চিম কাৰ্বি আংলং জিলাৰ খেৰণি বনাঞ্চলিক কাৰ্যালয়ৰ অন্তৰ্গত হাৱাইপুৰ, জিৰিবাছা,হাজাগাফাৰ,মাইলু, লামছাখাং,খেৰণি কছাৰীবস্তী আদি বৃহত্তৰ অঞ্চলত এটা বৃহৎ বনৰীয়া হাতীৰ জাকে সন্ত্ৰাস চলাই স্থানীয় ৰাইজৰ জীৱন দুৰ্বিসহ কৰি তুলিছে। তেওঁলোকে অতি শীঘ্ৰে প্ৰশাসনৰ পৰা ক্ষতিপূৰণৰ দাবী জনোৱাৰ লগতে বনৰীয়া হাতীৰ তাণ্ডৱ আৰু সন্ত্ৰাসৰ পৰা পৰিত্ৰাণ পোৱাৰ বাবে বন বিভাগ আৰু চৰকাৰক যথোচিত ব্যৱস্থা গ্ৰহণ কৰাৰ দাবী জনাই।
