ভাৰতীয় জলপথ ব্যৱহাৰ কৰি কাঠমাণ্ডুলৈ পৰিবহন সম্পন্ন কৰিব পৰা এটা ব্যৱস্থা গঢ় দিবলৈ ভাৰত আৰু নেপালৰ মাজত আৰম্ভ হৈছে এক পৰিবহন চুক্তিৰ পৰ্যালোচনা বৈঠক।
সংবাদ প্ৰতিষ্ঠানে প্ৰকাশ কৰা বাতৰি মতে মঙলবাৰে কাঠমাণ্ডুত আন্তঃ চৰকাৰী কমিটিৰ অন্তৰ্গত এখন উপ- সমিতিৰ বৈঠক আৰম্ভ হৈছে।আনহাতে এই সন্দৰ্ভতে দুয়োখন চুবুৰীয়া ৰাষ্ট্ৰৰ মাজত অহা বৃহস্পতিবাৰে এখন বাণিজ্যিক সচিব পৰ্যায়ৰ বৈঠক অনুষ্ঠিত হ’ব বুলি জানিব পৰা গৈছে।
প্ৰসংগক্ৰমে উল্লেখযোগ্য যে যোৱা ৬-৮ এপ্ৰিলত ভাৰত ভ্ৰমণ কৰা নেপালৰ প্ৰধানমন্ত্ৰী কে পি শৰ্মা অলিৰ উপস্থিতিত ভাৰতৰ আম্ভ্যন্তৰীণ জল পৰিবহন ব্যৱহাৰ সন্দৰ্ভত দুয়োখন ৰাষ্ট্ৰই যুটীয়া বিবৃতি প্ৰকাশ কৰিছিল। য’ত নেপালৰ বাবে প্ৰথমবাৰলৈ সমুদ্ৰ পথ মুকলিৰ প্ৰস্তাৱ দিয়া হৈছিল।
ইয়াৰ জৰিয়তে দুয়োখন ৰাষ্ট্ৰৰ মাজত বাণিজ্যিক সম্পৰ্ক দৃঢ় হোৱাৰ লগতে ইয়ে ৰাষ্ট্ৰ দুখনৰ দ্বিপাক্ষিক সম্পৰ্ক যথেষ্ট উন্নত কৰিব বুলি আশা কৰিছে বিশেষজ্ঞ সকলে।
আনহাতে এই বিষয়টো আগুৱাই নিয়াৰ বাবে নেপাল আৰু ভাৰতে যুটীয়া গৱেষণা গোট গঠনৰ পৰিকল্পনা কৰা বুলিও প্ৰকাশ কৰিছে সংবাদ মাধ্যমে।
