ৰাজ্যখনত বিদ্যালয় এৰা শিশুৰ সংখ্যা হ্ৰাস কৰাৰ বাবে আৰু ৰাজ্যখনৰ নিবনুৱাক উৎসাহিত কৰাৰ বাবে মণিপুৰৰ বিজেপি নেতৃত্বাধীন মিত্ৰজোঁটৰ চৰকাৰখনে দুখন আঁচনি মুকলি কৰিছে। এই আঁচনি দুখনৰ নাম হ’ল ক্ৰমে লাইৰিক টামহানলাছি (Lairik Tamhanlasi), যাৰ অৰ্থ হ’ল ‘তেওঁলোকক শিকিবলৈ দিয়া’ আৰু ষ্টাৰ্ট আপ মণিপুৰ।
ৰাজ্যখনৰ মুখ্য মন্ত্ৰী এন বীৰেন সিং, শিক্ষা মন্ত্ৰী টি ৰাধেশ্যাম আৰু কৃষি মন্ত্ৰী ভি হংখলিয়ান, মুখ্য সচিব আৰ আৰ ৰশ্মি, প্ৰধান সচিব (পৰিকল্পনা আৰু শিক্ষা) বিনীত যোশী, শিক্ষা আৰু পৰিকল্পনা বিভাগৰ সঞ্চালক এই অনুষ্ঠানটোত উপস্থিত আছিল।
আঁচনি দুখন মুকলি কৰা অনুষ্ঠানত উপস্থিত থকা মুখ্য মন্ত্ৰী বীৰেন সিঙে কয়, লাইৰিক টামহানলাছি আঁচনিখনৰ লক্ষ্য হ’ল কোনো শিশুৱে যাতে উচ্চতৰ মাধ্যমিক পৰ্য্যন্ত তেওঁলোকৰ শিক্ষাৰ অধিকাৰ লাভ কৰাৰ পৰা বাদ নপৰে সেইটো নিশ্চিত কৰা। এই আঁচনিখনৰ জৰিয়তে চৰকাৰী বিদ্যালয়ৰ ছাত্ৰ-ছাত্ৰীক নামভৰ্তিৰ খৰচ, পৰীক্ষা আৰু টিউশ্যন ফীজ, য়ুনিফ’ৰ্ম আৰু পাঠ্যপুথিৰ খৰচ যোগান ধৰা হ’ব। শিক্ষা বিভাগৰ এটা বিশেষ কোষ এই আঁচনিৰ ৰূপায়ণকাৰী হ’ব আৰু এই শিতানৰ বাবে বাজেটত ১৬ কোটি টকা ধাৰ্য্য কৰা হৈছে বুলি তেওঁ কয়।
জানিব পৰা মতে আৰ্থিকভাৱে দুৰ্বল শ্ৰেণীৰ ছাত্ৰ-ছাত্ৰীসকলৰ মাজত হাইস্কুল আধাতে এৰা প্ৰতিবেদনত প্ৰকাশ পোৱা তথ্য বিবেচনা কৰি এই পদক্ষেপ লোৱা হৈছে।
শিক্ষা বিভাগৰ বিষয়াসকলে চলোৱা এটা সমীক্ষাত পোৱা গৈছে যে মণিপুৰত প্ৰায় ৪০ হাজাৰ স্কুল এৰা ছাত্ৰ-ছা্ত্ৰী আছে।
উল্লেখযোগ্য যে ৰাজ্যখনৰ নতুন চৰকাৰৰ দ্বাৰা ইয়াৰ বৰ্ষপূৰ্তি উপলক্ষে দুখীয়া, অভাৱী আৰু আনভাৱে সক্ষম লোকসকলৰ বাবে বিভিন্ন আঁচনি মুকলি কৰা হৈছে। এইবোৰ উদ্বোধনৰ পষেক (Inauguration Fortnight) কাৰ্য্যসূচীৰ অধীনত এইবোৰ আঁচনি উদ্বোধন কৰা হৈছে। ইয়াৰ ভিতৰত এই স্কুল এৰা ছাত্ৰ-ছাত্ৰী হ্ৰাস কৰাৰ এই আঁচনিখন বিশেষভাৱে উল্লেখযোগ্য।
আনহাতে ষ্টাৰ্ট আপ মণিপুৰ আঁচনিখনে ৰাজ্যখনৰ নিবনুৱা যুৱক-যুৱতীক নতুন উদ্যোগ, ব্যৱসায় হাতত লোৱাৰ বাবে উৎসাহ দিব বুলি মুখ্য মন্ত্ৰীজনে ব্যক্ত কৰে। এই আঁচনিৰ অধীনত ২০১৭-১৮ আৰু ২০১৮-১৯ বৰ্ষৰ বাবে ৩০ কোটি টকা ধাৰ্য্য কৰা হৈছে।
