শেহতীয়াকৈ প্ৰবল বৰষুণৰ ফলত নীপকোৱে দৈয়াং জলবিদ্যুৎ প্ৰকল্পৰ চাৰিখনকৈ গেট খোলাৰ পিছতে গোলাঘাট জিলাৰ সৰুপথাৰ সমজিলাৰ ২৫ খন গাঁও বানত আক্ৰান্ত হৈছে। দৈয়াং আৰু ধনশিৰি নদীৰ লগতে উপনৈসমূহ উফন্দি উঠাত নৈপৰীয়া অঞ্চলবোৰত পানী প্ৰৱেশ কৰি এক ভয়ংকৰ পৰিস্থিতিৰ সৃষ্টি কৰিছে।
বানৰ কৱলত পৰি প্ৰায় ৪০০ পৰিয়াল ঘৰৰ ত্যাগ কৰিবলগীয়া হৈছে। প্ৰশাসনে এতিয়ালৈকে ৭ টা বান শিবিৰ স্থাপন কৰি প্ৰায় ১৮০০ গৰাকী লোকক আশ্ৰয় প্ৰদান কৰিছে বুলি সদৰী কৰিছে। শিবিৰসমূহত খাদ্য সামগ্ৰীৰ যোগান, খোৱা-খোৱাৰ পানী আৰু স্বাস্থ্য পৰীক্ষাৰ ব্যৱস্থা কৰা লগতে গৃহপশুৰ বাবে বিশেষভাৱে খাদ্য যোগানৰো ব্যৱস্থা কৰা হৈছে।
সৰুপথাৰ সমজিলা আয়ুক্ত মানসজ্যোতি নাথে সংবাদমাধ্যমৰ আগত মত প্ৰকাশ কৰে যে এই মুহূর্তত ২৫ খন গাঁও পানীত জুৰুলা হৈছে। প্ৰায় ১৮০০ জন লোক ৭ টা শিবিৰত আশ্ৰয় লৈ আছে। ক্ষতিগ্ৰস্ত কৃষকসকলে কৃষি ফচল বীমা আঁচনিৰ জৰিয়তে ক্ষতিপূৰণ লাভ কৰিব, লগতে দুৰ্যোগ ব্যৱস্থাপনাৰ দিশৰ পৰা বিশেষ সহযোগিতা কৰা হ’ব।
তথাপিও বান শিবিৰত থকা লোকসকলে ঘৰুৱা জীৱনৰ ভৱিষ্যতক লৈ গভীৰ চিন্তা প্ৰকাশ কৰিছে। বানে কেৱল ঘৰৰ সামগ্ৰী নহয়, বৃহৎ পৰিমাণৰ কৃষি ভূমিও বিনষ্ট কৰিছে। এজন পীড়িত মহিলাই উচুপি কয় যে“নীপকোৱে পানী খোলাৰ আগতে প্ৰশাসনে আমাক জনাব লাগিছিল। কিন্তু জনোৱা হোৱা নাছিল। এতিয়া ঘৰৰ সামগ্ৰী আৰু খেতি পানীৰ তলত। ঘৰলৈ উভতি যোৱাৰ পিছত আমি কেনেদৰে জীৱন যাপন কৰিম সেই কথা ভাবিলে হৃদয় কঁপি উঠে।”
শিক্ষা ব্যৱস্থাও সম্পূৰ্ণৰূপে বিঘ্নিত হৈ পৰিছে। বান শিবিৰত থকা অভিভাৱকসকলে জানিবলৈ দিছে যে, বিদ্যালয়লৈ যাব পৰা ৰাস্তা বানে ধ্বংস কৰি পেলাইছে। ফলত ছাত্ৰ-ছাত্ৰীসকল পঢ়াশুনিৰ পৰা বঞ্চিত হৈ পৰিছে।
চলিত বছৰত ইতিমধ্যে তৃতীয়বাৰ বানে আঘাত হানিলে সৰুপথাৰ সমজিলাৰ বহুসংখ্যক গাঁৱক। প্ৰশাসনে উদ্ধাৰ অভিযান অব্যাহত ৰাখিছে যদিও বন্যাৰ্তসকলৰ মুখত একে প্ৰশ্ন “শিবিৰৰ পৰা ঘৰলৈ উভতিলেই আমি কি কৰিম?”
