ত্ৰিপুৰাৰ নৱনিৰ্বাচিত চৰকাৰখনে ৰাজ্যখনক নিচাজাতীয় দ্ৰব্যৰ পৰা মুক্ত কৰাৰ উদ্দেশ্যে অভিযান তীব্ৰতৰ কৰি তোলাৰ সময়তে মঙলবাৰে আৰক্ষীয়ে পুনৰ এক অভিযান চলাই ৰাজ্যখনৰ ৰাজধানী আগৰতলাৰ পৰা বৃহৎ পৰিমাণৰ নিচাজাতীয় সামগ্ৰী ব্ৰাউন ছুগাৰসহ এজন ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয়।
পূব আগৰতলা আৰক্ষী থানাৰ বিষয়া দেবাশীষ সাহাই এই কথা জানিবলৈ দি কয়, ‘সদৰ মহকুমা আৰক্ষী বিষয়াৰ নেতৃত্বত পূব আগৰতলা আৰক্ষীৰ এটা অভিযানকাৰী দলে মঙলবাৰে বিয়লি প্ৰায় ৩.৩০ মান বজাত বিবেকানন্দ ষ্টেডিয়ামৰ আশে পাশে এক অভিযান চলাই সন্দেহজনক ব্ৰাউন ছুগাৰৰ ৫০ টা পেকেট জব্দ কৰাৰ লগতে বাসুদেব দেববৰ্মা নামৰ এজন ড্ৰাগছ মাফিয়াক গ্ৰেপ্তাৰ কৰে’।
আৰক্ষী বিষয়াজনে লগতে জানিবলৈ দি কয় যে ধৃত লোকজনৰ পৰা নিচাজাতীয় সামগ্ৰীৰ উপৰি আমেৰিকান ডলাৰৰ লগতে কিছু আপত্তিজনক সামগ্ৰী জব্দ কৰিবলৈ সক্ষম হৈছে। বৰ্তমান ধৃত লোকজনক আৰক্ষীয়ে জেৰা অব্যাহত ৰখা বুলিও সংবাদ মাধ্যমক জনায়।
উল্লেখ্য যে ত্ৰিপুৰাৰ মুখ্য মন্ত্ৰী বিপ্লৱ দেৱে ৰাজ্যখনক নিচাজাতীয় সামগ্ৰীৰ কৱলৰ পৰা মুক্ত কৰিব লাগে বুলি ঘোষণা কৰাৰ পাছতে ৰাজ্যৰ আৰক্ষীয়ে ইয়াৰ বিৰুদ্ধে ধাৰাবাহিকভাৱে অভিযান চলাই থকাৰ পৰিপ্ৰেক্ষিততে বিগত কিছু দিনত ৰাজ্যখনত প্ৰায় ৭০ জনৰো অধিক লোক গ্ৰেপ্তাৰ হৈছে।
ইয়াৰ উপৰি বৃহৎ পৰিমাণৰ গাঞ্জা, ড্ৰাগছ, ব্ৰাউন ছুগাৰ, কফ ছিৰাপকে আদি কৰি বিভিন্ন নিচাজাতীয় সামগ্ৰী জব্দ কৰি বৃহৎ সফলতা লাভ কৰিবলৈ সক্ষম হোৱাটো স্বাভাৱিকতে এখন ৰাজ্যৰ বাবে সুখৰ খবৰ।
