মণিপুৰ চৰকাৰৰ শিক্ষা বিভাগে ৰাষ্ট্ৰীয় মাধ্যমিক শিক্ষা অভিযানৰ অধীনত স্নাতক শিক্ষকৰ চাকৰি লাভৰ বাবে ভুৱা মাৰ্কশ্বিট তথা প্ৰমাণ পত্ৰ দাখিল কৰাৰ বাবে ৰাজ্যখনৰ বিভিন্ন স্থানত চাকৰি কৰি থকা ছয় গৰাকী শিক্ষকক বৰ্খাস্ত কৰে।
সংবাদ মাধ্যমৰ বাতৰি অনুসৰি বৰ্খাস্ত হোৱা শিক্ষক কেইগৰাকীয়ে ২০১৬ চনৰ ২২ ডিচেম্বৰত ৰাষ্ট্ৰীয় মাধ্যমিক শিক্ষা অভিযানৰ অধীনত স্নাতক শিক্ষক হিচাপে নিযুক্তি লাভ কৰিছিল।
তেওঁলোকে স্নাতক শিক্ষকৰ বাবে বাধ্যতামূলক বিএড ডিগ্ৰীৰ ভুৱা মাৰ্কশ্বিট তথা প্ৰমাণ পত্ৰ দাখিল কৰিছিল।
স্নাতক শিক্ষক হিচাপে নিযুক্তি লাভৰ বাবে প্ৰৱঞ্চনাৰ আশ্ৰয় লোৱা ছয় গৰাকী শিক্ষকক শিক্ষা বিভাগৰ সঞ্চালক (বিদ্যালয় পৰ্যায়ৰ) টিএইচ কিৰনকুমাৰে বৰ্খাস্তৰ নিৰ্দেশ দি সুকীয়াকৈ পত্ৰ প্ৰেৰণ কৰিছে।
সঞ্চালকগৰাকীয়ে লগতে ৰাষ্ট্ৰীয় মাধ্যমিক শিক্ষা অভিযানৰ অতিৰিক্ত ৰাজ্যিক প্ৰকল্প সঞ্চালকগৰাকীক ভুৱা শিক্ষক কেইগৰাকীৰ বিৰুদ্ধে এমাহৰ ভিতৰত এজাহাৰ দাখিল কৰিবলৈ নিৰ্দেশ দিয়াৰ লগতে তেওঁলোকে চাকৰি কালত গ্ৰহণ কৰা দৰমহা আৰু অন্যান্য ভাট্টাৰ ধনসমূহ ছয় মাহৰ ভিতৰত আদায় কৰিবলৈকো নিৰ্দেশ দিয়ে।
চাকৰিৰ পৰা বৰ্খাস্ত হোৱা শিক্ষক কেইগৰাকী হৈছে ছালাম টাম্ফাছানা দেৱী, মানসী পামেই, লাকীছন মাংটে, টি লেটখাগিন হাওকিপ, আখামিলুউ গোনমেই আৰু কিউছিয়ানাং কাহমেই।
জানিব পৰা মতে ছালাম টাম্ফাছানা দেৱীয়ে ২০০৫ চনত বিএড ডিগ্ৰী দ্বিতীয় শ্ৰেণীত উত্তীৰ্ণ হৈছিল। কিন্তু তেওঁ শিক্ষা বিভাগত দাখিল কৰা প্ৰমাণ পত্ৰত প্ৰথম শ্ৰেণী দেখুওৱা হৈছিল আৰু মাৰ্কশ্বিটখনো কলেজৰ তথ্যৰ লগত পৰীক্ষা কৰি চোৱাৰ পিছত সেইখন জালিয়াতি কৰা বুলি শিক্ষা বিভাগ নিশ্চিত হৈছিল।
তদুপৰি, দেৱীয়ে দাখিল কৰা উচ্চ আৰু উচ্চতৰ মাধ্যমিক পৰীক্ষাৰ প্ৰমাণ পত্ৰ তথা মাৰ্কশ্বিটো ভুৱা বুলি প্ৰমাণিত হৈছে।
আনহাতে, ২০১৪ চনত ইম্ফলৰ ডি এম কলেজ অফ টিচাৰ এডুকেশ্যনৰ পৰা বিএড উত্তীৰ্ণ বুলি দাখিল কৰা হাওকিপৰ প্ৰমাণ পত্ৰখনো ভুৱা বুলি চিনাক্ত হৈছে কিয়নো কলেজৰ তথ্য অনুসৰি তেওঁ সেই কলেজৰ ছাত্ৰই নাছিল।
