মণিপুৰ উচ্চ ন্যায়ালয়ৰ মুখ্য ন্যায়াধীশ হিচাপে আজি শপতগ্ৰহণ কৰিছে ন্যায়াধীশ অভিলাষা কুমাৰীয়ে।
মণিপুৰৰ ৰাজ্যপাল ডঃ নাজমা হেপতুলাই তেওঁক শপতবাক্য পাঠ কৰোৱায়।
ৰাজ্যৰ মুখ্য মন্ত্ৰী বিৰেন সিং, বিৰোধী নেতা ইববি সিং, বিধানসভাৰ অধ্যক্ষ, কৰ্মৰত মুখ্য ন্যায়াধীশ এন ক’তিশ্বৰকে আদি কৰি বিভিন্ন ৰাজনৈতিক নেতা, আমোলা, আইনজীৱীৰ উপস্থিতিত ইম্ফলৰ ৰাজ ভৱনত এই শপতগ্ৰহণ অনুষ্ঠিত হয়। ইয়াৰ পূৰ্বে ত্ৰিপুৰা উচ্চ ন্যায়ালয়ৰ ন্যায়াধীশ হিচাপে সেৱা আগবঢ়োৱা কুমাৰী মণিপুৰ উচ্চ ন্যায়ালয়ৰ ৩য় গৰাকী সৰ্বক্ষণৰ ন্যায়াধীশ।
কুমাৰীয়ে ১৯৮৪ চনত উকীল হিচাপে কৰ্মজীৱন আৰম্ভ কৰিছিল।
ত্ৰিপুৰাৰ পূৰ্বে গুজৰাট উচ্চ ন্যায়ালয়ৰ ন্যায়াধীশৰূপে কাৰ্য্যনিৰ্বাহ কৰা কুমাৰী ন্যায়াধীশ হিচাপে নিযুক্ত হোৱাৰ পূৰ্বে হিমাচল প্ৰদেশ চৰকাৰ আৰু কেন্দ্ৰীয় চৰকাৰৰ বিভিন্ন আইনী পৰামৰ্শদাতা পদবীৰ দায়িত্বত আছিল।
কংগ্ৰেছ চৰকাৰ শাসনলৈ অহাৰ পিছত ২০০৩ চনৰ মাৰ্চত তেওঁ হিমাচল প্ৰদেশৰ অতিৰিক্ত মহাধিবক্তা হিচাপে নিযুক্ত হৈছিল।
কুমাৰী হিমাচল প্ৰদেশৰ প্ৰাক্তন মুখ্য মন্ত্ৰী ৰাজা ৱীৰভদ্ৰ সিঙৰ কন্যা।
