ভাৰতৰ কোটিপতি মুখ্য মন্ত্ৰীৰ তালিকাৰ দ্বিতীয় স্থানত অৰুণাচল প্ৰদেশৰ মুখ্য মন্ত্ৰী পেমা খাণ্ডুৰ। এছোছিয়েশ্যন ফ’ৰ ডেম’ক্ৰেটিক ৰিফৰ্মছ এণ্ড নেশ্যনেল ইলেকশ্যন ৱাটছে দেশৰ মুখ্য মন্ত্ৰী সকলৰ সম্পত্তিৰ তালিকা প্ৰকাশ কৰি এই কথা সদৰী কৰে।
তথ্যত প্ৰকাশিত অনুসৰি দেশৰ কোটিপতি তালিকাৰ প্ৰথম স্থানত আছে অন্ধ্ৰ প্ৰদেশৰ মুখ্য মন্ত্ৰী চন্দ্ৰ বাবু নাইডু আৰু তৃতীয় স্থানত আছে পঞ্জাৱৰ মুখ্য মন্ত্ৰী অমৰিন্দৰ সিং।
এই সংস্থাটোৱে দেশৰ ২৯ খন ৰাজ্যৰ মুখ্য মন্ত্ৰী তথা ২ খন কেন্দ্ৰীয় শাসিত ৰাজ্যৰ মুখ্য মন্ত্ৰী সকলৰ সম্পত্তিৰ ওপৰত বিশ্লেষণ চলাইছিল আৰু তাৰ পিছতে এই তথ্য প্ৰকাশ পাইছে।
এছোছিয়েশ্যন ফ’ৰ ডেম’ক্ৰেটিক ৰিফৰ্মছ এণ্ড নেশ্যনেল ইলেকশ্যন ৱাটছে দেশৰ বৰ্তমান কাৰ্যনিৰ্বাহ কৰি থকা মুখ্য মন্ত্ৰী সকলৰ নিজৰ শপত পত্ৰ সমূহৰ পৰাই এই বিশ্লেষণ কৰিছে। মুখ্য মন্ত্ৰী সকলে শেহতীয়াকৈ দাখিল কৰা শপত পত্ৰ সমূহৰ পৰা এই তথ্য আহৰণ কৰা বুলি সংস্থাটোৱে জানিবলৈ দিয়ে।
সংস্থাটোৱে সদৰী কৰা তথ্য অনুসৰি ৩১ জন মুখ্য মন্ত্ৰীৰ ভিতৰত ২৫ জন মুখ্য মন্ত্ৰীয়েই কোটিপতি। চন্দ্ৰ বাবু নাইডুৰ সৰ্বমুঠ সম্পত্তি ১৭৭ কোটিৰো অধিক। আনহাতে অৰুণাচলৰ মুখ্য মন্ত্ৰী খাণ্ডুৰ সম্পত্তি হ’ল ১২৯ কোটি আৰু অমৰিন্দৰ সিঙৰ হ’ল ৫৪৮ কোটি।
ইয়াৰ বিপৰীতে বাওঁপন্থী নেতা তথা ত্ৰিপুৰাৰ মুখ্য মন্ত্ৰী মানিক সৰকাৰ হ’ল আটাইতকৈ কম সম্পত্তি থকা মুখ্য মন্ত্ৰী। তেওঁৰ মুঠ সম্পত্তি হ’ল ২৬ লাখ। তালিকাত কম সম্পত্তিৰ দ্বিতীয় স্থানত মুঠ সম্পত্তি ৩০ লাখেৰে পশ্চিম বংগৰ মুখ্য মন্ত্ৰী মমতা বেনাৰ্জী আৰু তৃতীয় স্থানত জন্মু আৰু কাশ্মীৰৰ মুখ্য মন্ত্ৰী মেহবুবা মুফটী। মুঠ সম্পত্তি ৫৫ লাখ।
