আহি আছে ত্ৰিপুৰাৰ পঞ্চায়ত নিৰ্বাচন। নিৰ্বাচনৰ পূৰ্বে পোহৰলৈ আহিছে এক চাঞ্চল্যকৰ খবৰ। ত্ৰিপুৰাত পঞ্চায়ত নিৰ্বাচনৰ পূৰ্বে বি এছ এফে এগৰাকী বিজেপি প্ৰাৰ্থীৰ ঘৰৰ পৰা উদ্ধাৰ কৰিছে প্ৰায় ৫০ লাখ টকাৰ ড্ৰাগছ।
প্ৰতিবেদন অনুসৰি ধনপুৰ গ্ৰাম পঞ্চায়তৰ ৪ নং ৱাৰ্ডৰ বিজেপি প্ৰাৰ্থী বচ্চু মিঞাৰ ঘৰত গোপন সূত্ৰৰ পৰা তথ্য লাভ কৰি বিএছএফ আৰু আৰক্ষীয়ে অভিযান চলায়।
তালাচীৰ সময়ত নেতাগৰাকীৰ ঘৰৰ পৰা বৃহৎ পৰিমাণৰ ড্ৰাগছ উদ্ধাৰ কৰা হয়। যাৰ আনুমানিক মূল্য ৫০ লাখ টকাৰো অধিক।
উদ্ধাৰ হোৱা ড্ৰাগছখিনি জব্দ কৰিছে বি এছ এফে। এই ড্ৰাগছ সমূহৰ ভিতৰত আছে ৩৫ কেজি গাঞ্জা আৰু ৩৭৬০ বটল ফেনচিডাইল। জব্দ কৰা ড্ৰাগছখিনি বিএছএফৰ বল্লদেপা শিবিৰলৈ লৈ যোৱা হয়। অৱশ্যে ড্ৰাগছ উদ্ধাৰ কৰি উভতি অহাৰ পথত একাংশ অচিনাক্ত দুষ্কৃতিকাৰীয়ে বিএছএফৰ জোৱানক গুলীচালনা কৰে। ইয়াৰ প্ৰত্যুতৰ হিচাপে সেনাইয়ো গুলীচালনা কৰে। সেনাৰ গুলীত দুষ্কৃতিকাৰীয়ে পলায়ন কৰে।
এই ঘটনাত বাওঁপন্থীয়ে বিজেপিক লক্ষ্য কৰি লৈছে। চিপিআইএমৰ জিলা সম্পাদক ভানুলাল সাহাই কয়, ‘বিজেপিয়ে কাক মনোনীত কৰিছে? এইবোৰ পৰিঘটনা তাৰ প্ৰমাণ।’
প্ৰসংগক্ৰমে অহা ৮ আগষ্টত ত্ৰিপুৰাত পঞ্চায়ত নিৰ্বাচন অনুষ্ঠিত হ’ব। ১২ আগষ্টত ভোট গণনা কৰা হ’ব। পঞ্চায়ত নিৰ্বাচনৰ পূৰ্বে ত্ৰিপুৰাত ৭০ শতাংশতকৈ অধিক আসনত বিনা প্ৰতিদ্বন্দ্বিতাত জয়লাভ কৰিছে বিজেপিয়ে। ৬,৩৭০খন গ্ৰাম পঞ্চায়তৰ আসনৰ ভিতৰত বিজেপিয়ে বিনা প্ৰতিদ্বন্দ্বিতাৰে ৪৫৫০খন আসন লাভ কৰে। ২৩৫খন পঞ্চায়ত সমিতি আৰু ২০খন জিলা পৰিষদৰ আসনত বিনা প্ৰতিদ্বন্দ্বিতাত বিজেপি প্ৰাৰ্থীয়ে জয়লাভ কৰে।
২০১৯ চনৰ ত্ৰিপুৰা পঞ্চায়ত নিৰ্বাচনত গ্ৰাম পঞ্চায়তৰ ৮৬ শতাংশ আসনত বিনা বিনা প্ৰতিদ্বন্দ্বিতাৰে নিৰ্বাচিত হৈছিল বিজেপিৰ প্ৰাৰ্থী। কিন্তু এতিয়া বিজেপি নেতাৰ ঘৰত ড্ৰাগছ উদ্ধাৰ হোৱা ঘটনাই সমগ্ৰ ৰাজ্যতে তীব্ৰ প্ৰতিক্ৰিয়াৰ সৃষ্টি কৰিছে।
