১৩ বহাগ শুকুৰবাৰে কোকৰাঝাৰৰ হৰিণাগুৰিত অনুষ্ঠিত ৬ষ্ঠ বাউখুংগ্ৰি উৎসৱৰ দ্বিতীয় দিনা মেধাৱী শিক্ষাৰ্থীক উদগনি দিয়াৰ লক্ষ্যৰে সৰ্বমুঠ ১৯২ গৰাকী মেধাৱী শিক্ষাৰ্থীৰ মাজত চেক আৰু ৮৮ গৰাকী দৰিদ্ৰ সীমাৰেখাৰ তলৰ ছাত্ৰীৰ মাজত বিতৰণ কৰিছে বি টি চিৰ শিক্ষা বিভাগে।
অনুষ্ঠানত শিক্ষা বিভাগে হাইস্কুল, উচ্চতৰ মাধ্যমিক আৰু হাই মাদ্ৰাছা উত্তীৰ্ণ তিনিজন শিক্ষাৰ্থীৰ প্ৰত্যেককে ২ লাখ টকাকৈ আৰ্থিক সাহাৰ্য প্ৰদান কৰা হয়। কেন্দ্ৰীয় লোকসেৱা পৰীক্ষাৰ প্ৰশিক্ষণৰ বাবে ১২ গৰাকী শিক্ষাৰ্থীৰ প্ৰত্যেককে প্ৰথম কিস্তিৰ ধন ১.৫০ হাজাৰ টকাকৈ, ১৮ গৰাকী আই আই টি শিক্ষাৰ্থীৰ প্ৰত্যককে ২ লাখ টকাকৈ, ৮ গৰাকী আই আই এমৰ শিক্ষাৰ্থীৰ প্ৰত্যেককে ২ লাখ টকাকৈ, ৪১ গৰাকী মেডিকেল শিক্ষাৰ্থীৰ প্ৰত্যেককে ১ম কিস্তিৰ ১ লাখ টকাৰ, ২২গৰাকী এন আই টিৰ শিক্ষাৰ্থীৰ প্ৰত্যেককে ৫০ টকাৰ, ৮৮ গৰাকী গৱেষণাৰ শিক্ষাৰ্থীৰ প্ৰত্যেককে ৫০ হাজাৰকৈ টকাৰ চেক আৰু দৰিদ্ৰ সীমাৰেখাৰ তলৰ ৮৮ গৰাকী ছাত্ৰীক স্কুটী প্ৰদান কৰা হয়। এই উদগনিমূলক ধনৰাশি আৰু চেকসমূহ শিক্ষাৰ্থীসকল ৰ হাতত অৰ্পণ কৰে মুখ্য অতিথি, বি টি চিৰ উপ মুখ্য কাৰ্যবাহী বিষয়া কাম্পা বৰগয়াৰী, সন্মানীয় অতিথি ই এম এছ দনেশ্বৰ গয়াৰী, আনছুমৱি খুংগুৰ বড়ো, বি টি ছিৰ প্ৰধান সচিব বীৰেণ চন্দ্ৰ ফুকন, আৰু অন্যন্য বিশিষ্ট লোকসকলে। ভাষণত বি টি চিৰ উপ মুখ্য কাৰ্যবাহী বিষয়া কাম্পা বৰগয়াৰীয়ে কয় যে ২০০৩লৈকে বি টি চি এলেকাত স্বাক্ষৰতাৰ হাৰ যথেষ্ট নিম্ন আছিল, কিন্তু বিকাশৰ গতি ত্বৰান্বিত হোৱাৰ ফলত শিক্ষাৰ ক্ষেত্ৰখনলৈ পৰিৱৰ্তন আহিছে।
ইয়াৰ পূৰ্বে হৰিণাগুৰি হাইস্কুলৰ খেলপথাৰত আৰতৰ বিভিন্ন প্ৰান্তৰ যেনে বিহাৰ, উত্তৰ প্ৰদেশ, বেংগল, নাগালেণ্ড, ত্ৰিপুৰা আদি ৰাজ্যৰ ৭৩ পুৰুষ আৰু ১৮ মহিলাৰ মুঠ ৯১ গৰাকী প্ৰতিযোগীয়ে পাহাৰ বগোৱা প্ৰতিযোগিতাত অংশগ্ৰহণ কৰিছিল। উক্ত প্ৰতিযোগিতাত উত্তৰ প্ৰদেশৰ যোগেন্দ্ৰ কুমাৰ, অসমৰ বিজয় ডেকা আৰু পশ্চিম বংগৰ দুলু সৰকাৰে যথাক্ৰমে ১ম, ২য় আৰু ৩য় স্থান দখল কৰিছিল।
