মৰিগাঁও জিলাৰ লাহৰীঘাট আৰক্ষী থানাৰ অন্তৰ্গত চেতুৱাই খাইতি গাঁৱত কালি নিশা এক চুৰিকাণ্ড সংঘটিত হয়। ঘটনাৰ বিৱৰণী মৰ্মে নিশা গাঁওখনৰ ইমূৰৰ পৰা সিমূৰলৈ কেইবাটাও ঘৰত চুৰিকাণ্ড সংঘটিত কৰি অবশেষত ধৃত চোৰজন ৰাইজৰ ৰোষত পৰে।
প্ৰাপ্ত তথ্য মতে, চোৰজনে গাঁওখনৰ আমতলি নিবাসী জাকিৰ হুছেইনৰ গৃহৰ পৰা এটি মবাইল ফোন লৈ যায়। ইমানতে ক্ষান্ত নাথাকি তেওঁ গাঁওখনৰ আনতোমূৰত থকা আব্দুৰ ৰহমানৰ গৃহত প্ৰবেশ কৰাত দুজন মাছমৰীয়াই প্ৰত্যক্ষ কৰে আৰু লগে লগে ৰাইজৰ মাজত হুৱা দুৱা লাগে।
ধৃত চোৰজনে পলায়ন কৰিবলৈ অপচেষ্টা চলাই যদিও স্থানীয় ৰাইজে তেওঁক কৰায়ত্ত কৰিবলৈ সক্ষম হয়। ধৃত চোৰজন লাহৰীঘাট থানাৰ অন্তৰ্গত দাতিয়ালবড়ী গাৱৰ জিন্নত আলীৰ পুত্ৰ আবুল হুছেইন (৩২) বুলি চিনাক্ত কৰা হৈছে।
বিগত দিনত ধৃত চোৰজনে লাহৰীঘাট অঞ্চলৰ বিভিন্ন ঠাইত সন্ত্ৰাসৰ সৃষ্টি কৰি আহিছে বুলি অঞ্চলটোৰ লোকসকলে অভিযোগ কৰে। পিছত ৰাইজে আটকাধীন তেওঁক আৰক্ষীক গতাই দিয়ে। সম্প্ৰতি লাহৰীঘাট আৰক্ষীয়ে ধৃত চোৰজনক সোধ পোছ অব্যাহত ৰাখিছে ।
