ন্যায়ৰ অপেক্ষাত বন্দী এটা পৰিয়াল! আজিৰ পৰা ২৮ বছৰ পূৰ্বে গুৱাহাটীৰ মাজমজিয়াত হত্যা কৰা হৈছিল অকুতোভয় সাংবাদিক পৰাগ কুমাৰ দাসক৷বুধবাৰ শীৰ্ষক সাপ্তাহিক বাতৰিকাকতখনৰ জৰিয়তে অসমীয়া জাতীয়তাবাদত নৱজাগৰণৰ সৃষ্টি কৰা পৰাগ কুমাৰ দাস আছিল অসমীয়াক শোষণ কৰা প্ৰতিটো উৎসৰ বাবে মূৰৰ কামোৰণি৷
দিল্লী স্কুল অৱ্ ইকনমিক্সৰ দৰে খ্যাতনামা শিক্ষানুষ্ঠানৰ পৰা শিক্ষা সাং কৰা পৰাগ কুমাৰ দাসে স্বদেশ আৰু স্বজাতিৰ বাবে পঞ্জাব নেশ্যনেল বেংক আৰু গুৱাহাটী ষ্টক একছেঞ্জৰ লোভনীয় চাকৰি পৰিত্যাগ কৰিছিল৷নিজৰ কলমৰ ধাৰেৰে আশীৰ দশকৰ পৰাই প্ৰান্তিক,দ্য ছেণ্টিনেল আদি আলোচনী-কাকতত লিখা প্ৰৱন্ধই সেই সময়ত অসম জোকাৰি গৈছিল৷দাসে নিজৰ জীৱনকালত বুধবাৰ,অসমীয়া প্ৰতিদিনৰ দৰে কাকতৰ সম্পাদনা কৰিছিল৷তদুপৰিৰ আগানৰ দৰে আলোচনীও পৰাগ কুমাৰ দাসৰ ছত্ৰছায়াতে লালিত-পালিত হৈছিল৷ৰাষ্ট্ৰৰ বাবে চিন্তাৰ বিষয় হৈ পৰা পৰাগ কুমাৰ দাসক ১৯৯২ আৰু ১৯৯৩ চনত পৰাগ কুমাৰ দাসক ৰাষ্ট্ৰীয় নিৰাপত্তা আইন চমুকৈ NSA আৰু টাডা আইনৰ অধীনত গ্ৰেপ্তাৰ কৰা হয়৷তদুপৰি পৰাগ কুমাৰ দাসৰ দ্বাৰা ৰচনা কৰা ‘স্বাধীনতাৰ প্ৰস্তাৱ’ শীৰ্ষক গ্ৰন্থখন বাজেয়াপ্ত কৰি নিষিদ্ধ ঘোষণা কৰে৷
১৯৯১ চনৰপৰা পৰাগ কুমাৰ দাসে মানৱ অধিকাৰ সংগ্ৰাম সমিতিৰ আহ্বায়ক আৰু পাছলৈ সচিব প্ৰধান হিচাপে কাৰ্যনিৰ্বাহ কৰিছিল।তদুপৰি দাস উত্তৰ-পূব মানৱ অধিকাৰ সমন্বয় ৰক্ষীসমিতিৰ সচিব প্ৰধান আছিল।পৰাগ কুমাৰ দাস ১৯৯২ আৰু ১৯৯৪ চনত গঠিত বাক্ স্বাধীনতা সংগ্ৰাম সমিতি আৰু গণতান্ত্ৰিক অধিকাৰ সংগ্ৰাম সমিতিৰ সক্ৰিয় নেতা আছিল।
আজিৰ দিনটোত ৰাজ্যত পৰাগ কুমাৰ দাসৰ স্মৃতি দিৱস উদ্যাপনৰ ঢৌ সৃষ্টি হৈছে৷এয়া সুখৰ কথা কিন্তু পৰাগ কুমাৰ দাসৰ আপোচবিহীনতাক জীয়াই ৰাখিব কেইজনে পাৰিছে! ৰাষ্ট্ৰযন্ত্ৰৰ বিৰুদ্ধ সৰব হোৱা পৰাগ কুমাৰ দাসৰ দৰে সাংবাদিক আজি দিনত আছনে? নে সকলোৱে মাত্ৰ হয় হুজুৰ কৰিছে আৰু নিয়মমাফিকভাৱে পৰাগ কুমাৰ দাসৰ স্মৃতিদিৱস উৎযাপন কৰা হৈছে৷এয়া আত্মসমালোচনাৰ সময়,ভুলবোৰৰ বিৰুদ্ধে ‘পৰাগ’ৰ দৰে চকুত চকু থৈ উত্তৰ দিয়াৰ সময়৷
