ৰাষ্ট্ৰীয় বঁটাপ্ৰাপ্ত তথা ৰাজ্যখনৰ এজন আগ শাৰীৰ চিনেমা নিৰ্মাতা বিদ্যুৎ কাকতীৰ দ্বাৰা নিৰ্মিত উচ্চ প্ৰশংসিত ছবি ‘শৈশৱতে ধেমালিতে’ বা ‘ৰেইনব’ ফিল্ড’ৰ সংগীত আজি গুৱাহাটীত মুকলি কৰা হয়। উল্লেখযোগ্য যে এই চিনেমাখন যোৱা মাহত গোৱাত অনুষ্ঠিত মৰ্য্যাদাপূৰ্ণ আন্তঃৰাষ্ট্ৰীয় ছবি মহোৎসৱত প্ৰদৰ্শিত হৈছিল। তাৰোপৰি চিনেমাখন ইতিপূৰ্বে আন্তঃৰাষ্ট্ৰীয় স্তৰতো প্ৰশংসা বুটলিবলৈ সক্ষম হৈছে। চিনেমাখনৰ সংগীত ৰচনা কৰিছে আন এজন ৰাষ্ট্ৰীয় পুৰস্কাৰপ্ৰাপ্ত অসমীয়া অনুৰাগ শইকীয়া। গীতকেইটিত কণ্ঠদান কৰিছে জুবিন গাৰ্গ, নীলোৎপল আৰু নৱাগত দীপক্ষীয়ে। চিনেমাখনৰ কাহিনীৰ পটভূমি হ’ল ১৯৮০ চনৰ অসম, যিসময়ত অসম আন্দোলনে অসমৰ পৰিৱেশ অগ্নিগৰ্ভ কৰি ৰাখিছিল। চিনেমাখনত পৰিচালকে সেই সময়ছোৱাৰ পৰিস্থিতিয়ে শিশুৰ মনত পেলোৱা প্ৰভাৱ তথা শিশুৰ আক্ৰান্ত মনস্তত্ত্বক দাঙি ধৰাৰ চেষ্টা কৰিছে।
তাৎপৰ্য্যপূৰ্ণ যে ছ’নি মিউজিকৰ দ্বাৰা মুকলি কৰিব লগীয়া এইখনেই হ’ব প্ৰথম চিনেমা। ছ’নিৰ সৈতে একেলগে ধ্বনি ৰেকৰ্ডছৰ পৰাণ বৰকটকীয়ে এলবামটোৰ বিতৰণৰ সম্পূৰ্ণ স্বত্ব লাভ কৰিছে। এই সম্পৰ্কত নিজৰ উচ্ছ্বাস প্ৰকাশ কৰি বৰকটকীয়ে কয় যে এইটোৱে হ’ল ছ’নি মিউজিকে মুকলি কৰা অসমীয়া চিনেমাৰ গানৰ প্ৰথমটো এলবাম।
আনহাতে সংগীত পৰিচালক অনুৰাগ শইকীয়াই এলবামটোৰ সৈতে তেওঁৰ যাত্ৰা সম্পৰ্কত নিজৰ অভিজ্ঞতাক সুঁৱৰি তেওঁ চিনেমাখনৰ কাহিনীৰ সৈতে সংগীতক যিমান পাৰি সিমান সংগতিপূৰ্ণ কৰিবলৈ নিজকে কিমান গভীৰভাৱে ইয়াত সুমাব লগীয়া হৈছিল তাক বৰ্ণনা কৰে।
চিনেমাখনত অসমৰ নিপন গোস্বামী আৰু নিকুমণি বৰুৱাৰ লগতে প্ৰখ্যাত অভিনেতা বলিউদৰ অভিনেতা ভিক্টৰ বেনাৰ্জী, নকুল ভৈদ, নাভেদ আচলামেও অভিনয় কৰিছে। চিনেমাখনৰ এটা উল্লেখযোগ্য দিশ হ’ল এইখনত মুম্বাই নিৱাসী ছুপাৰ ম’ডেল দ্বীপান্বিতা শৰ্মাৰ প্ৰথম অসমীয়া ছবি।
