নাগালেণ্ডক সাম্প্ৰদায়িক শক্তিৰ পৰা বচাবলৈ সকলো ধৰ্ম নিৰপেক্ষ ৰাজনৈতিক শক্তিক এক হোৱাৰ আহ্বান জনাই আজি ৰাজ্যখনৰ বিৰোধী দল এন পি এফ (নাগা পীপলছ ফ্ৰণ্ট) আৰু কংগ্ৰেছে হাত মিলাইছে। অহা ২৮ মে’ত অনুষ্ঠিত হ’ব লগীয়া ৰাজ্যখনৰ একমাত্ৰ লোকসভা আসনখনৰ বাবে এই দুয়োটা দলে উমৈহতীয়া যুঁজ দিব বুলি ঘোষণা কৰে।
আজি এন পি এফ দলৰ প্ৰাৰ্থী এপক জমিৰৰ সৈতে একেলগে উপস্থিত থকা এখন সভাত নাগালেণ্ড প্ৰদেশ কংগ্ৰেছৰ সভাপতি কে থেৰিয়ে কয় যে সাম্প্ৰদায়িক শক্তিৰ বিৰুদ্ধে একেলগে যুঁজ দিয়াৰ বাবে সহমতত উপনীত হোৱাৰ পিছত এন পি এফে ইতিমধ্যে এপক জমিৰক তেওঁলোকৰ প্ৰাৰ্থী ঘোষণা কৰিছে। ফেক জিলাত হোৱা এই সভাখনত এন পি এফ দলৰ আন কেইবাজনো নেতাও উপস্থিত আছিল।
আনহাতে এন পি এফ দলৰ মুখ্য কাৰ্য্যালয়ৰ পৰা প্ৰচাৰিত এখন বিজ্ঞপ্তিত কোৱা হৈছে যে থেৰিয়ে সকলো ধৰ্ম নিৰপেক্ষ দলক সাম্প্ৰদায়িক শক্তিৰ বিৰুদ্ধে একেলগে থিয় হ’বলৈ আহ্বান জনাইছে।
সভাখনত এপকে কয় যে তেওঁ দলৰ প্ৰত্যাশা পূৰ কৰিব পাৰিব বুলি আত্মবিশ্বাসী।
নাগালেণ্ড প্ৰদেশ কংগ্ৰেছ কমিটিৰ সভাপতিজনে কয়, “বিজেপি কেতিয়াও নাগাসকলৰ ৰাজনৈতিক দল নাছিল। কিন্তু এতিয়া হিন্দুত্বই নাগা যুৱচামৰ মনত বিভ্ৰান্তিৰ সৃষ্টি কৰিছে।” তেওঁ আন সকলো ৰাজনৈতিক প্ৰভেদ আওকাণ কৰি, ধৰ্ম নিৰপেক্ষ দলবোৰ একগোট হ’ব লাগে, যাতে ৰাজ্যখনত হিন্দুত্বৰ আৰোপণক আঁতৰাই ৰাখিব পাৰি।
মন কৰিব লগীয়া যে প্ৰাক্তন মুখ্য মন্ত্ৰীৰ টি আৰ জেলিয়াঙৰ নেতৃত্বৰ আগৰখন চৰকাৰৰ সময়ত দলটোৱে কংগ্ৰেছ দলৰ ১১ জন বিধায়কক নিজ দলৰ সৈতে চামিল কৰি পেলাইছিল আৰু ৰাজ্যখনত বিৰোধী নোহোৱা কৰিছিল।
থেৰিয়ে নাগাসকলক বিজেপি আৰু আৰ এছ এছক পাতল ধৰণে নল’বলৈ সকীয়া দিয়ে। লগতে তেওঁ কয় যে বিজেপি-আৰ এছ এছৰ দৰে মিত্ৰ দল এন ডি পি পিও একে।
