শেহতীয়াকৈ হোজাই জিলাত আইনী কাম-কাজৰ বাবে অত্যাৱশ্যকীয় দলিল বিচাৰি হাবাথুৰি খাবলগীয়া হৈছে সর্বসাধাৰণ নাগৰিক৷ শংকৰদেৱ নগৰ ন্যায়িক আদালতৰ অনুজ্ঞা-পত্র থকা ভেণ্ডৰসকলৰ হাতত এতিয়া ৫ টকীয়া, ১০ টকীয়া আৰু ২০ টকীয়া দলিল বিচাৰি নাপায় হতাশ হ’বলগীয়া হৈছে অঞ্চলটোৰ স্থানীয় নাগৰিকসকল৷
কিন্তু অতি তাৎপৰ্যপূৰ্ণভাৱে এই দলিলসমূহ কেতবোৰ অনুজ্ঞা-পত্র নথকা বিপণী তথা দালালৰ হাতত উভৈনদী হৈ আছে৷
আনহাতে স্থানীয় ৰাইজে উত্থাপন কৰা অভিযোগ অনুসৰি এনেদৰে এচাম মধ্যভোগী দালালে এই ১০ টকীয়া আৰু ২০ টকীয়া দলিলৰ কৃত্রিম নাটনি সৃষ্টি কৰি গোপনে দলিলসমূহ নির্ধাৰিত মূল্যতকৈ অত্যধিক মূল্যত বিক্রী কৰি আহিছে৷
জানিব পৰা মতে এচাম মধ্যভোগী দালালে ১০ টকীয়া দলিলত ৫০-ৰ পৰা ২৫০ টকা পর্যন্ত আৰু ২০ টকীয়া দলিলত ১০০-ৰ পৰা ৩০০ টকা পর্যন্ত মূল্য আদায় কৰি সর্বসাধাৰণ ৰাইজক একপ্রকাৰৰ লুণ্ঠন চলাই আহিছে৷ একেদৰে ৫০ টকীয়া দলিল ১০০ টকাত আৰু ১০০ টকাৰ দলিল ২০০ৰ পৰা ৩০০ টকাত বিক্রী হৈ অহাৰো অভিযোগ উত্থাপিত হৈছে৷
ইফালে এই ক্ষেত্ৰত ভেণ্ডৰসকলক সোধ-পোছ কৰাত তেওঁলোকে ট্রেজাৰিত দলিল নাই়, আমাৰ কৰিব লগা একো নাই বুলি কয়। স্থানীয় উত্থাপন কৰা প্ৰশ্ন অনুসৰি প্ৰকৃততে যদি ট্ৰেজাৰিত দলিল নাই তেন্তে এই মধ্যভোগী দালাল সকলৰ হাতত দলিল ক’ৰ পৰা আহিছে।
স্থানীয় ৰাইজে এই ক্ষেত্ৰত ৰাজ্য চৰকাৰক যথোপযুক্ত ব্যৱস্থা গ্ৰহণ কৰি অঞ্চলটোৰ ৰাইজক সকাহ দিবলৈ আহ্বান জনাইছে।
