এন আৰ চি উন্নীতকৰণত সংযোগী নথি (linkage data) হিচাপে পঞ্চায়তৰ প্ৰমাণপত্ৰক বৈধতা দি আজি উচ্চতম ন্যায়ালয়ে প্ৰদান কৰা ৰায়ত সন্তুষ্টি প্ৰকাশ কৰি অসম প্ৰদেশ কংগ্ৰেছ কমিটিয়ে আজি আবেলি ৰাজীৱ ভৱনত এখন সংবাদমেলৰ আয়োজন কৰে। উক্ত সংবাদমেলত অসম প্ৰদেশ কংগ্ৰেছ কমিটিৰ সভাপতি ৰিপুন বৰা, প্ৰাক্তন মন্ত্ৰী তথা চামগুৰি সমষ্টিৰ বিধায়ক ৰকিবুল হুছেইন আৰু ৱাজেদ আলী চৌধুৰী উপস্থিত আছিল। ৰিপুন বৰাই উচ্চতম ন্যায়ালয়ৰ ৰায়টোক ঐতিহাসিক ৰায় বুলি কয়। তেওঁ কয় যে গুৱাহাটী উচ্চ ন্যায়ালয়ে এন আৰ চি প্ৰক্ৰিয়াত পঞ্চায়তৰ নথিক অবৈধ বুলি ঘোষণা কৰাত এই পক্ৰিয়াত এক অনিশ্চয়তা অহাৰ লগতে বহুতৰ মনত শংকা আৰু উদিগ্নতাৰ সৃষ্টি হৈছিল। ইয়াক লৈ এচাম ৰাজনৈতিক দলে ৰাজনীতি কৰা বুলিও তেওঁ মত প্ৰকাশ কৰে। উচ্চতম ন্যায়ালয়ৰ এই ৰায়ে অসমৰ দীৰ্ঘদিনীয়া বিদেশী সমস্যা সমাধান হোৱাত এক বলিষ্ঠ ভূমিকা গ্ৰহণ কৰিব বুলি সংবাদ মাধ্যমক জানিবলৈ দিয়ে। ৰায়টোক আদৰণি জনোৱাৰ লগতে ৰিপুন বৰাই অহা ৩১ ডিচেম্বৰত প্ৰকাশ পাব লগীয়া এন আৰ চিৰ খচৰা তালিকা পঞ্চায়তৰ নথি দিয়া লোকসকলৰো নাম অন্তৰ্ভুক্ত কৰি প্ৰকাশ কৰিবলৈ দাবী কৰে। সংবাদমেলখনত বৰাই ৰাষ্ট্ৰীয় নাগৰিক পঞ্জীৰ ৰাজ্যিক সমন্বয়ক প্ৰতীক হাজেলাই সৃষ্টি কৰা বিভ্ৰান্তিৰ বাবেও তেওঁক সমালোচনা কৰে। প্ৰতীক হাজেলাই সৃষ্টি কৰা অ’আয়ে সাধাৰণ লোকৰ মাজত শংকা মাতি আনিছিল বুলি তেওঁ কয়। উল্লেখযোগ্য যে অ’ আই সম্পৰ্কত কংগ্ৰেছ বিধায়িনী দলৰ কমলাক্ষ দে’ পুৰকায়স্থ, ৱাজেদ আলী চৌধুৰী, শুকুৰ আলী, ৰূপজ্যোতি কুৰ্মী, নৰুল হুদা, এ কে ৰচিদ আলম আৰু ৰাজদীপ গোৱালাকে ধৰি মুঠ ৭ জন বিধায়কে উচ্চতম ন্যায়ালয়ত হস্তক্ষেপ বিচাৰি ৭ খন আৱেদন দাখিল কৰিছিল। আনাহাতে এন আৰ চিৰ সন্দৰ্ভত মুখ্য মন্ত্ৰী সৰ্বানন্দ সোণোৱালে এন আৰ চিৰ বিৰোধিতা কৰা সকলৰ বিৰুদ্ধে বিহিত ব্যৱস্থা হাতত ল’ব বুলি কোৱা মন্তব্যকো এক প্ৰকাৰৰ উভতি ধৰে। তেওঁ সোণোৱাললৈ প্ৰশ্নবাণ এৰি কয় ‘প্ৰতীক হাজেলাই প্ৰকৃততে এন আৰ চিৰ ক্ষেত্ৰত বাদা প্ৰদান কৰিছিল, কিন্তু ৰাজ্য চৰকাৰে তেওঁৰ বিৰুদ্ধে ব্যৱস্থা গ্ৰহণ কৰিব নে নকৰে? তেওঁ আৰু কয় যে প্ৰতীক হাজেলাৰ ভুলৰ বাবেই এন আৰ চিৰ কাম এবছৰ পিছুৱাই গ’ল আৰু তেৱেঁই হৈছে প্ৰথমজন ব্যক্তি যি এন আৰ চিৰ ক্ষেত্ৰত বিধি-পথালি দিছে।
আনহাতে সংবাদমেলখনত প্ৰদেশ কংগ্ৰেছৰ সভাপতিজনে প্ৰধান মন্ত্ৰী নৰেন্দ্ৰ মোদীকো কঠোৰ ভাষাৰে সমালোচনা কৰা দেখিবলৈ পোৱা গ’ল। ৰাহুল গান্ধী কংগ্ৰেছৰ সভাপতি হোৱা প্ৰসংগতো তেওঁ কয় যে বিকাশৰ কথা কোৱা প্ৰধান মন্ত্ৰীয়ে ৰাহুল গান্ধীক সমালোচনা কৰি সময় নষ্ট কৰিছে। আৰু দেশখন আগুৱাই নিয়াত গুৰুত্ব প্ৰদান নকৰি ৰাহুল গান্ধীক ইতিকিং কৰাত ব্যস্ত আছে। সংবাদমেলখনত উপস্থিত প্ৰাক্তন মন্ত্ৰী তথা বৰ্তমানৰ কংগ্ৰেছী বিধায়ক ৰকিবুল হুছেইনেও উচ্চতম ন্যায়ালয়ৰ ৰায়ক আদৰণি জনাই এই ৰায়ে অসমবাসীক ৰাইজৰ লগতে যুৱ প্ৰজন্মক উৎসাহ যোগাব বুলিও মত প্ৰকাশ কৰে।
