অভিলাষ বৰাৰ জন্মদিনত বোকাখাতত অভিলাষ প্ৰকাশনৰ গ্ৰন্থ উন্মোচনী আৰু বঁটা বিতৰণী সভা
অভিলাষ প্ৰকাশনৰ উদ্যোগত আসাম ফাইন আৰ্টচ একাডেমিৰ সহযোগত যোৱা ২৭ মে’ত অনুষ্ঠিত হৈ যোৱা চিত্ৰাঙ্কন প্ৰতিযোগিতাৰ আজি বঁটা বিতৰণী সভা বোকাখাতৰ সত্য নাৰায়ণ সেৱা সদনত অনুষ্ঠিত হৈ হয়।
প্ৰয়াত অভিলাষ বৰাৰ ২৪ সংখ্যক জন্মদিনৰ লগত সংগতি ৰাখি অনুষ্ঠিত হোৱা এই চিত্ৰাঙ্কন প্ৰতিযোগিতাত প্ৰায় পোন্ধৰ শ প্ৰতিযোগিয়ে অংশ গ্ৰহন কৰিছিল। এই প্ৰতিযোগিতাৰ আজি অনুষ্ঠিত বঁটা বিতৰণী সভাৰ লগতে আন বৰ্ষৰ দৰে এইবাৰো অভিলাস প্ৰকাশনৰ গ্ৰন্থও প্ৰকাশ কৰা হয়।
আজিৰ অনুষ্ঠানৰ আৰম্ভনিতে অভিলাষৰ আইতাক মাকন বৰাৰ লগতে শিশু সাহিত্যিক শান্তনু তামুলী, চিত্ৰশিল্পী মুকুল দুৱৰা, জ্যেষ্ঠ সাংবাদিক ভৱানন্দ কলিতা, বোকাখাত জে ডি এচ জি মহাবিদ্যালয়ৰ অধ্যক্ষ ড০ জয়ন্ত গগৈ আৰু ড০ অৰুণ বৰাই বন্তি প্ৰজ্বলন কৰে।
আদৰণি ভাষনত অভিলাষৰ মাতৃ জে ডি এছ জি মহাবিদ্যালয়ৰ অসমীয়া বিভাগৰ অধ্যাপিকা তথা অভিলাষ প্ৰকাশনৰ অধ্যক্ষা ড০ ৰুবী বৰাই অভিলাষ প্ৰকাশনৰ লক্ষ্য উদ্দেশ্য সম্পৰ্কে বাখ্যা কৰে। অনুষ্ঠানত অভিলাষ প্ৰকাশনৰ উদ্যোগত এইবাৰ প্ৰকাশ কৰি উলিওৱা ড০ ৰুবী বৰাৰ শিশু গ্ৰন্থ “জয়মতী” উন্মোচন কৰে শিশু সাহিত্যিক শান্তনু তামুলীৰ লগতে দহ গৰাকী শিশুয়ে।
গ্ৰন্থ উন্মোচন কৰি শান্তনু তামুলীয়ে ভাষা ৰক্ষাৰ ক্ষেত্ৰত শিশু সকলৰ ওপৰত এটা জাতিৰ ভবিষ্যত নিৰ্ভৰ কৰে আৰু শিশু সকলক সাধুকথাৰ জৰিয়তে শিক্ষা দিয়াৰ ব্যৱস্থা কৰিলে জ্ঞান আহৰণত সুবিধা হোৱাৰ উপৰিও বহুতো জটিল বিষয়ো সহজেই শিশু সকলে আয়ত্ব কৰিব পাৰে বুলি মন্তব্য কৰে।
অনুষ্ঠানত অভিলাষ বৰাৰ অনুপস্থিতিত তেওঁৰ ২৪ সংখ্যক জন্মদিন কেক কাটি উদযাপন কৰা হয়। ৰূপজ্যোতি ভড়ালীয়ে আঁত ধৰা সভাত অভিলাষ প্ৰকাশনৰ অধ্যক্ষ ড০ ৰুবী বৰাই সকলোৰে শলাগ লয়।