ডিব্ৰুগড় জিলা আৰু সত্ৰ ন্যায়াধীশৰ আদালততে আজি ১৫ জুনত বয় তেজৰ বন্যা। পূৰ্ণ নাহৰ ডেকা নামৰ এজন অভিযুক্তই আদালত চৌহদতে পত্নীৰ ডিঙি চোকা কটাৰীৰে ৰেপি হত্যা কৰে।
পত্নীহন্তা নাহৰ ডেকাই নিজৰ জীয়েকক ধৰ্ষণ কৰা বুলি পত্নীয়ে তেওঁৰ বিৰুদ্ধে তৰা গোচৰৰ শুনানিৰ বাবে আজি আদালতত তেওঁলোক হাজিৰ হৈছিল।
আৰক্ষী সূত্ৰ অনুসৰি আজি পুৱা ১০.৪০ মান বজাত আদালতৰ দৈনন্দিন কাম-কাজ আৰম্ভ হোৱাৰ সময়তে ঘটনাটো ঘটে। পূৰ্ণ নাহৰ ডেকা তেওঁৰ পত্নী আৰু পৰিয়ালৰ আন লোকৰ সৈতে আদালতত বহি থকা অৱস্থাতে তেওঁলোকৰ মাজত কিবা কথা কটাকটি লগাৰ লগে লগে কোনেও তলকিব পৰাৰ আগতেই ডেকাই জেপৰ পৰা এখন কটাৰী উলিয়াই পত্নী ৰীতাৰ ডিঙিত ৰেপ দিয়ে।
‘লগে লগে তেজেৰে তুমৰলি হৈ ঠাইতে বাগৰি পৰে মহিলাগৰাকী,’ প্ৰত্যক্ষদৰ্শীৰ ভাষ্য। ঘটনাটোৰ লগে লগে আদালতৰ হতভম্ব লোকসকলৰ মাজত হুৱা দুৱা লাগে।
হত্যাকাৰী নাহৰ ডেকাই ডিব্ৰুগড় আৰক্ষীক দিয়া ভাষ্যত পত্নী ৰীতাৰ আন এজন লোকৰ সৈতে বিবাহ বহিৰ্ভূত সম্পৰ্ক থকা আৰু জীয়েকক ডিমাপুৰত বেচিবলৈ চেষ্টা কৰা বুলি অভিযোগ কৰিছে।
মহিলাগৰাকীক ততাতৈয়াকৈ অসম চিকিৎসা মহাবিদ্যালয়লৈ নিয়া হয় যদিও ইতিমধ্যে তেওঁৰ মৃত্যু হয়। ‘আমি লগে লগে হত্যাকাৰীক গ্ৰেপ্তাৰ কৰিছো আৰু কাইলৈ তেওঁক আদালতত হাজিৰ কৰোৱা হ’ব,’ আৰক্ষী সূত্ৰত প্ৰকাশ।
আৰক্ষীৰ সূত্ৰ অনুসৰি নিহত ৰীতা ডেকাই গিৰীয়েক নাহৰ ডেকাৰ বিৰুদ্ধে তেওঁলোকৰ ১৩ বছৰীয়া জীয়েকক ঘৰতে ধৰ্ষণ কৰা বুলি যোৱা ২০১৭ চনত ডিব্ৰুগড়ৰ নাহৰকটীয়া আৰক্ষী থানাত গোচৰ দিছিল।
‘ভুক্তভোগী (পত্নী) গৰাকীয়ে নিজৰ জীয়েকক ধৰ্ষণ কৰা বুলি গিৰীয়েকৰ বিৰুদ্ধে যোৱা ২০১৭ চনত গোচৰ দিছিল। তেওঁ (অভিযুক্ত) জন ৯ মাহ ৫ দিন ডিব্ৰুগড় জিলা কাৰাগাৰত বন্দী হৈ আছিল। যোৱা ৬ জুনত তেওঁক আদালতে জামিন দিছিল। আজি তেওঁ শুনানিৰ বাবে আহিছিল। তেওঁৰ পত্নী আৰু পৰিয়ালৰ আন লোকসকলো আদালত কক্ষত উপস্থিত আছিল,’ নৰ্থ ইষ্ট নাও-ক জনালে ডিব্ৰুগড় আৰক্ষী থানাৰ ভাৰপ্ৰাপ্ত বিষয়া সিদ্ধেশ্বৰ বৰাই।
হত্যাকাৰী নাহৰ ডেকাৰ বিৰুদ্ধে ডিব্ৰুগড় আৰক্ষী থানাত ভাৰতীয় দণ্ডবিধিৰ ৩০২/৫০৬ ধাৰাত এক গোচৰ ৰুজু কৰা হৈছে।
আনহাতে ঘটনাটোৰ পিছতে আদালতখনত নিৰাপত্তা বৃদ্ধিৰ বাবে উকীলসকলে দাবী জনাইছে।
