অসম আৰু মণিপুৰত ৩টা নতুন মাছৰ প্ৰজাতি আৱিষ্কাৰ কৰিছে অসম আৰু মণিপুৰৰ এদল গৱেষকৰ দলে। নতুনকৈ আৱিষ্কাৰ হোৱা মাছৰ প্ৰজাতিকেইটা হৈছে Garra biloborostris, Garra clavirostris আৰু Garra substrictorostris। নিউজিলেণ্ডৰ অ’কলেণ্ডৰ পৰা প্ৰকাশিত আন্তঃজাতিক বিজ্ঞান আলোচনী জুটাক্সাক এই বিষয়ক এটা প্ৰৱন্ধ প্ৰকাশিত হৈছে।
ইয়াৰে প্ৰথম দুটা প্ৰজাতিৰ মাছ ভূটান সীমান্তত থকা ব্ৰহ্মপুত্ৰৰ উপনদী কানামাক্ৰা নিজৰা আৰু হাফলঙৰ সমীপৱৰ্তী দিয়াং নদীত আৰু আনটো প্ৰজাতি বৰাকৰ উপনদী লেইমটক নিজৰাত পোৱা গৈছে।
মণিপুৰ বিশ্ববিদ্যালয়ৰ নাৰেংবাম ৰ’নি নামৰ গৱেষকগৰাকীয়ে কৈছে, ‘আমাৰ নতুন আৱিষ্কাৰটো সম্পৰ্কে লিখা গৱেষণাপত্ৰখন কিছু পূৰ্বে জমা দিয়া হৈছিল যদিও আন্তঃজাতিক পুনৰীক্ষকসকলে পুংখানুপুংখ পৰীক্ষা কৰাৰ পিছতহে ইয়াৰ অধিকভাগ গৃহীত হৈছিল।
৭-৮ ইঞ্চি দীঘল মাছৰ এই প্ৰজাতিকেইটা প্ৰৱল বৰষুণৰ পানীয়ে গঢ়া পাহাৰীয়া নিজৰাত পোৱা যায় । এই মাছক মণিপুৰত নগামু ছাংগুম আৰু অসমত শিল টকা (ডিমাছাত নাহলো আৰু বড়ো ভাষাত নাহ কান্দা) কোৱা হয়।
গৱেষকদলটোৰ গাইড ইণ্টাৰনেশ্যনেল য়ুনিয়ন ফ’ৰ কনজাৰভেশ্যন অব নেছাৰৰ (আই ইউ চি এন) পৰিস্কাৰ পানীৰ মাছ বিশেষজ্ঞ গোটৰ অধ্যাপক ডব্লিউ বিশ্বনাথনে জানিবলৈ দিছে যে এখন বিশেষজ্ঞ পেনেলে এই নতুন প্ৰজাতিকেইটৰ চিনাক্তকৰণ আৰু মূল্যায়ন কৰিছিল (তাৰে এজন আই ইউ চি এনৰ) আৰু প্ৰত্যেকটো প্ৰজাতিকে এটা সুকীয়া চিনাক্তকৰণ সংকেত সংখ্যা দিয়া সংস্থা লণ্ডনস্থিত ইণ্টাৰনেশ্যনেল কমিশ্যন অন জুঅ’লজিকেল নমেনক্লাছাৰ জমা দিছিল।
Garra clavirostris প্ৰজাতিটো দিয়াং নদীত হাফলং চৰকাৰী মহাবিদ্যালয়ৰ গৱেষকদ্বয় নাৰেংবাম ৰ’নি আৰু থাওচেন সৰ্বজিতে যুটীয়াকৈ আৱিষ্কাৰ কৰিছে আনহাতে আনহাতে Garra biloborostris আৰু Garra substrictorostris প্ৰজাতি দুটা গৱেষক ৰ’নিয়ে অসমৰ কানামাক্ৰা আৰু মণিপুৰৰ লেইমাটাক নিজৰাত আৱিষ্কাৰ কৰিছিল।
ৰ’নি আৰু সৰ্বজিতে অধ্যাপক বিশ্বনাথৰ অধীনত মৎস বিজ্ঞানৰ ওপৰত বিশদ প্ৰশিক্ষণ লৈছিল।
মণিপুৰ বিশ্ববিদ্যালয়ৰ লাইফ ছাইন্স বিভাগৰ মৎস বিজ্ঞান গোটৰ মুৰব্বী অধ্যাপক বিশ্বনাথে কৈছে যে শেহতীয়াকৈ আৱিষ্কাৰ হোৱা মাছৰ এই ৩টা প্ৰজাতি বিজ্ঞানৰ দৃষ্টিত নতুনকৈপৰিছে।
তেওঁ আৰু কয় যে বৈচিত্ৰপুৰ্ণ পাহাৰীয়া নিজৰা থকা উত্তৰ পূব ভাৰত প্ৰজাতিৰ বৈচিত্ৰতাত চহকী আৰু এতিয়ালৈকে স্বীকৃতি লাভ কৰা সমগ্ৰ বিশ্বৰ ২০০ বিধ Garra গণীয় মাছৰ ৩২টা প্ৰজাতি এই অঞ্চলত পোৱা যায়।
এই নৱতম আৱিষ্কাৰএৰে অধ্যাপক বিশ্বনাথৰ দলটোৱে ১৯৮৬ত আৱিষ্কাৰ কৰা Puntius jayaremi কে ( মণিপুৰৰ স্থানীয় নাম হেইকাক) ধৰি প্ৰায় ৮৫টা মাছৰ প্ৰজাতি আৱিষ্কাৰ কৰিছে।
