খৰালিৰ শুকান ধূলি তিয়াই আগন্তুক দুদিনৰ ভিতৰত উত্তৰ-পূৰ্বাঞ্চলৰ কেইবা ঠাইতো বৰষুণ হোৱাৰ সম্ভাৱনা আছে। এই পূৰ্বানুমান কৰিছে Skymet Weather নামৰ বতৰৰ আগ জাননী দিয়া এটা ৱেবছাইটে। ৱেবছাইটটোৱে দাবী কৰা মতে বংগোপ উপসাগৰৰ দক্ষিণ পশ্চিমৰ কোনো কোনো অংশত চলি থকা বা-মাৰলীয়ে উত্তৰ-পূবৰ দিশত গতি কৰাৰ সম্ভাৱনা আছে। তাৰ ফলতে অহা ২ আৰু ৩ জানুৱাৰিত পাতল বাৰষুণ হোৱাৰ সম্ভাৱনা আছে। ৱেবছাইটটোৱে দাবী কৰা মতে ৩১ ডিচেম্বৰৰ পৰাই বতৰ ডাৱৰীয়া হোৱাৰ সম্ভাৱনা আছে। বিশেষকৈ ত্ৰিপুৰা, মিজোৰাম, মণিপুৰ আৰু নাগালেণ্ডৰ অংশ বিশেষত এই বৰষুণৰ সম্ভাৱনা আছে। ৱেবছাইটটোৱে কোৱা মতে, আগৰতলা, শিলচৰ, আইজল, লেংপুই, ইম্ফল, মোককচাং, ক’হিমা, ওখা, মন আৰু জুনহেবোটোত বৰষুণৰ সম্ভাৱনা আছে। ৱেবছাইটটোৰ প্ৰতিবেদন মতে ডাৱৰৰ উপস্থিতিৰ বাবে ৰাতিৰ ভাগৰ তাপমাত্ৰা বৃদ্ধি আৰু দিনৰ ভাগৰ তাপমাত্ৰা হ্ৰাস পোৱাৰ সম্ভাৱনা আছে।
উল্লেখযোগ্য যে উত্তৰ-পূবত যোৱা কেইদিন মানৰ ভিতৰত ঘন কুঁৱলী দেখা গৈছে। লগতে অঞ্চলটোত বহু দিন ধৰি শুকান বতৰ দেখা গৈছে।
আগন্তুক সময়ছোৱাৰ ভিতৰত দিনৰ ভাগৰ তাপমাত্ৰা ২০–২৩ ডিগ্ৰী চেলছিয়াছ আৰু ৰাতিৰ ভাগৰ তাপমাত্ৰা ৯–১৩ ডিগ্ৰী চেলছিয়াছ হোৱাৰ সম্ভাৱনা আছে। পুৱাৰ ভাগত মধ্যমীয়াৰ পৰা ঘন কুঁৱলী পৰাৰ সম্ভাৱনা আছে।
