‘অসম আৰু অৰুণাচলৰ সামগ্ৰিক বিকাশৰ বাবে দুয়োখন ৰাজ্যই একতা আৰু ভাতৃত্ববোধৰ বান্ধোনেৰে হাতত হাত মিলাই আগবঢ়িব লাগিব। দুয়োখন ৰাজ্যৰ জৈৱ্য বৈচিত্ৰ্য অতিশয় চহকী। অঞ্চলটোত আছে প্ৰচুৰ সম্পদ আৰু সম্ভাৱনা। এই সম্পদ আৰু সম্ভাৱনাৰ উপযুক্ত প্ৰয়োগৰ জৰিয়তে বিকাশৰ গতি অধিক ত্বৰান্বিত কৰিব লাগিব।’ আজি অৰুণাচলৰ পূব চিয়াং জিলাৰ মেবোত মেগা আলি আয়ে লিগাং মহোৎসৱত অংশ গ্ৰহণ কৰি এই উপলক্ষে আয়োজিত বৰ্ণাঢ্য অনুষ্ঠানত অংশ গ্ৰহণ কৰি মুখ্য মন্ত্ৰী সৰ্বানন্দ সোণোৱালে এইদৰে কয়।
মুখ্য মন্ত্ৰী সৰ্বানন্দই অঞ্চলটোৰ জৈৱ্য বৈচিত্ৰ্য, প্ৰাকৃতিক ভাৰসাম্য অক্ষুণ্ণ ৰখাৰ বাবে মিলিত প্ৰচেষ্টাৰে সকলোকে কাম কৰিবলৈ আহ্বান জনোৱাৰ লগতে অসম চৰকাৰে প্ৰতি বছৰে ১০ কোটি গছ পুলি ৰোপণৰ বাবে লোৱা পদক্ষেপৰ কথাও উল্লেখ কৰে।
সৰ্বানন্দই কয় যে অসম চৰকাৰখনে ৰাজ্যৰ প্ৰতিটো জনগোষ্ঠীৰ লোককলা আৰু সাংস্কৃতিক জীৱনধাৰা বিকশাই তুলি সম বিকাশৰ ওপৰত সৰ্বাধিক গুৰুত্ব প্ৰদান কৰিছে।
আজিৰ এই মহোৎসৱত অৰুণাচলৰ বিধায়ক সকল ক্ৰমে কালিং টায়েং, অলম পানগিং, কেটু ৰেণা, গাম টায়েং, লখিমপুৰ লোকসভা সমষ্টিৰ সাংসদ প্ৰদান বৰুৱা, বিধায়ক সকল ক্ৰমে ৰণোজ পেগু, ঋতুপৰ্ণ বৰুৱা, ভূৱন পেগু, মিচিং স্বায়ত্ত শাসিত পৰিষদৰ মুখ্য কাৰ্যবাহী সদস্য পৰমানন্দ চায়েংগিয়া, সোণাৱাল কছাৰী স্বায়ত্ত শাসিত পৰিষদৰ মুখ্য কাৰ্যবাহী সদস্য দীপুৰঞ্জন মাক্ৰাৰী আৰু মেজৰ জেনেৰেল ভাস্কৰ কলিতাকে ধৰি বহু গণ্য-মান্য ব্যক্তি উপস্থিত আছিল।
