উচ্চতম ন্যায়ালয়ৰ গুৰুত্বপূৰ্ণ নিৰ্দেশ : আৰক্ষী সঞ্চালক প্ৰধান, আয়ুক্ত নিযুক্তিত য়ু পি এছ চিৰ অনুমোদন লওক
এটা গুৰুত্বপূৰ্ণ নিৰ্দেশত দেশৰ উচ্চতম ন্যায়ালয়ে ৩ জুলাইত সকলো ৰাজ্য তথা কেন্দ্ৰীয় শাসিত অঞ্চলক এইবুলি নিৰ্দেশ দিছে যে কোনো আৰক্ষী বিষয়াকে ভাৰপ্ৰাপ্ত আৰক্ষী সঞ্চালক প্ৰধান (ডি জি পি) ৰূপে নিযুক্তি দিব নালাগে। লগতে এইবুলিও নিৰ্দেশ দিয়ে যে ডি জি পি আৰু আৰক্ষী আয়ুক্তৰ পদত নিযুক্তিৰ বাবে জ্যেষ্ঠ আৰক্ষী বিষয়াসকলৰ নাম প্ৰাৰ্থী ৰূপে কেন্দ্ৰীয় লোকসেৱা আয়োগলৈ (য়ু পি এছ চি) প্ৰেৰণ কৰিব লাগে। য়ু পি এছ চিয়ে ইয়াৰ মাজৰ পৰা তিনিজনীয়া এখন তালিকা প্ৰস্তুত কৰিব। আৰু তাৰ পিছত ৰাজ্য চৰকাৰে এই তালিকাৰ পৰাই যিকোনো এজন বিষয়াক ডি জি পি ৰূপে নিযুক্তি দিব পাৰিব।
উচ্চতম ন্যায়ালয়ৰ মুখ্য ন্যায়াধীশ দীপক মিশ্ৰ ন্যায়াধীশৰ নেতৃত্বতৰ এখন বিচাৰপীঠে এই নিৰ্দেশটো দিয়া বুলি জানিব পৰা গৈছে।
বিৰাৰপীঠখনে নিৰ্দেশটোত লগতে কৈছে যে এনেকুৱা পদত নিযুক্তিৰ সময়ত নিযুক্তি দিবলগীয়া বিষয়াজনৰ কাৰ্যকাল যাতে যুক্তিসংগতভাৱে যথেষ্ট হয় সেইটোও চাব লাগে।
আনহাতে, আৰক্ষী বিষয়াৰ নিযুক্তিৰ সম্পৰ্কত ৰাজ্যসমূহৰ যদি কোনো ধৰণৰ নীতি-নিয়ম বা আইন আছে তেন্তে তাক সাময়িকভাৱে স্থগিত ৰাখিবলৈও বিচাৰপীঠখনে নিৰ্দেশ দিছে। লগতে এনেধৰণৰ আইন থকা ৰাজ্যবোৰে উচ্চতম ন্যায়ালয়ত ইয়াৰ ৰায়ৰ সংশোধনৰ বাবে আৱেদন জনাব পাৰিব। আৰক্ষীৰ সংস্কাৰ সম্পৰ্কীয় এটা গোচৰত উচ্চতম ন্যায়ালয়ে দিয়া সংশোধনী বিচাৰি কেন্দ্ৰই দাখিল কৰা এখন আৱেদনৰ শুনানি লৈ উচ্চতম ন্যায়ালয়ে এই নিৰ্দেশ দিছে বুলি জানিব পৰা গৈছে।