অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ শেহতীয়া তথ্য অনুসৰি, মঙলবাৰে অসমৰ বান পৰিস্থিতি পুনৰ ভয়াবহ হৈ পৰে। যোৱা ২৪ ঘণ্টাত বানৰ ফলত আৰু ৭ জন লোকৰ মৃত্যু হোৱাৰ লগে লগে ৰাজ্যখনত বানত প্ৰাণ হেৰুওৱা লোকৰ সংখ্যা ৭৫ জনলৈ বৃদ্ধি পাইছে। শেহতীয়া আটাইকেইটা মৃত্যুৰ খবৰ শিৱসাগৰ জিলাৰ পৰা আহিছে, যি বৰ্তমান ৰাজ্যখনৰ আটাইতকৈ বেছি ক্ষতিগ্ৰস্ত অঞ্চলসমূহৰ ভিতৰত অন্যতম হৈ পৰিছে।
এ এছ ডি এম এৰ বান বুলেটিন অনুসৰি, বৰ্তমান ৰাজ্যখনৰ ৭ খন জিলা ক্ৰমে শিৱসাগৰ, চৰাইদেউ, গোলাঘাট, যোৰহাট, নগাঁও, শোণিতপুৰ আৰু কামৰূপ (মহাঃ) বানৰ কৱলত পৰিছে। পূৰ্বৰ তুলনাত বানপীড়িত জিলাৰ সংখ্যা হ্ৰাস পাইছে যদিও ৰাজ্যৰ বিভিন্ন প্ৰান্তত এতিয়াও স্বাভাৱিক জনজীৱন ব্যাহত হৈ আছে।
চৰকাৰী তথ্য অনুসৰি, বানপানীৰ ফলত ৰাজ্যখনৰ ২১টা ৰাজহ চক্ৰৰ অন্তৰ্গত ৬২২ খন গাঁৱৰ ৩,৩২,৬৩৯ জন লোক ক্ষতিগ্ৰস্ত হৈছে। হাজাৰ হাজাৰ লোক এতিয়াও বানৰ পানীৰ মাজত আৱদ্ধ হৈ থকাৰ লগতে তেওঁলোকৰ জীৱিকা, অত্যাৱশ্যকীয় আন্তঃগাঁথনি আৰু সা-সম্পত্তিৰ ব্যাপক ক্ষতিসাধন হৈছে। বানৰ ফলত কৃষি খণ্ডৰো বিস্তৰ ক্ষতিসাধন হৈছে। ক্ষতিগ্ৰস্ত জিলাসমূহত প্ৰায় ৪৫,৩৪১.৯৮ হেক্টৰ কৃষিভূমি বানৰ পানীৰ তলত বুৰ গৈ আছে বুলি সদৰী কৰিছে।
