এছিয়ান গেইমছত ভাৰতীয় মহিলা আৰ্চাৰী দলত অসমৰ প্ৰমীলা দৈমাৰী
অসমৰ ক্ৰীড়া জগতৰ বাবে সুখবৰ। আন্তঃৰাষ্ট্ৰীয় পৰ্যায়ৰ বিভিন্ন খেলত অসমৰ খেলুৱৈয়ে এটাৰ পাছত আন এটা সফলতা লাভ কৰিবলৈ সক্ষম হোৱাৰ পাছত এইবাৰ আন্তঃৰাষ্ট্ৰীয় পৰ্যায়ত অসমৰ নাম জিলিকাবলৈ সাজু হৈ উঠিছে প্ৰতিভাৱান আৰ্চাৰ প্ৰমীলা দৈমাৰী ।
ওদালগুৰি জিলাৰ অন্তৰ্গত ভেৰগাঁৱ মহকুমাৰ অতি দৰিদ্ৰ পৰিয়ালৰ প্ৰতিভাৱান আৰ্চাৰ প্ৰমীলা দৈমাৰীয়ে আগন্তুক জাকাৰ্টা এছিয়ান গেইমছত প্ৰতিনিধিত্ব কৰিব ভাৰতীয় আৰ্চাৰ দলক। এছিয়ান গেইমছত একমাত্ৰ আৰ্চাৰ হিচাপে অসমৰ পৰা নিৰ্বাচিত হৈছে প্ৰমিলা দৈমাৰী৷
এছিয়ান গেইমছৰ দৰে বৃহৎ প্ৰতিযোগিতাত ভাৰতীয় দলত স্থান লাভ কৰিবলৈ সক্ষম হোৱাত প্ৰতিভাৱান আৰ্চাৰগৰাকী যথেষ্ট সুখী বুলি মন্তব্য কৰে। তেওঁ লগতে প্ৰতিযোগিতাত নিজৰ দক্ষতাৰ এশ শতাংশই ব্যৱহাৰ কৰি দেশৰ লগতে অসম মাতৃভূমিৰ নাম বিশ্ববাসীৰ আগত উজলাবলৈ চেষ্টা কৰিব বুলি কয়।
উল্লেখ্য যে ভাৰতৰ মহিলা আৰ্চাৰীৰ ৰিকাৰ্ভ শাখাত নিৰ্বাচিত হোৱা প্ৰমীলাই ইয়াৰ পূৰ্বেও ভাৰতৰ হৈ ৰিকাৰ্ভ শাখাত উল্লেখনীয় প্ৰদৰ্শন দাঙি ধৰি ভাৰতৰ নাম উজলাবলৈ সক্ষম হৈছে।
ইফালে অসমৰ আন এগৰাকী আৰ্চাৰ জয়ন্ত তালুকদাৰ ভাৰতীয় পুৰুষ দলত স্থান লাভ কৰিবলৈ বিফল হ’ল। ধাৰাবাহিকভাৱে নিৰাশাজনক প্ৰদৰ্শন কৰি অহা বাবেই স্থান লাভৰ পৰা বঞ্চিত হ’ল জয়ন্ত তালুকদাৰ।