অহা ৩০ জুলাইত প্ৰকাশ পাব ৰাষ্ট্ৰীয় নাগৰিকপঞ্জীৰ চূড়ান্ত খচৰা। বৰপেটা জিলা প্ৰশাসনে ইতিমধ্যে এন আৰ চিৰ কাম প্ৰায় সম্পূৰ্ণ কৰি তুলিছে।
বৰপেটা জিলাত নিয়োজিত এন আৰ চিৰ বিষয়া-কৰ্মচাৰীসকলে প্ৰায় ১৪ লাখ ৬০হাজাৰ তথ্য পৰীক্ষা সম্পূৰ্ণ কৰিছে। প্ৰথমখন খচৰাত ৩৮ শতাংশ লোকৰ নাম সন্নিৱিষ্ট হৈছিল যদিও এতিয়া সম্পূৰ্ণ খচৰাত এশ শতাংশ লোকৰ নামেই সন্নৱিষ্ট হ’ব।
বৰপেটা জিলাৰ উপায়ুক্ত থানেশ্বৰ মালাকাৰে জানিব দিয়া মতে, চূড়ান্ত খচৰাত জিলাখনৰ ৯৮৬৮ গৰাকী ‘ডি’ ভোটাৰৰ নাম, বিদেশী বুলি ঘোষণা কৰা ৩৪৪গৰাকী আৰু বিদেশী ন্যায়াধীকৰণত গোচৰ চলি থকা ৮৫১গৰাকীসহ মুঠ ১১০৬৩গৰাকীৰ নাম বাদ পৰিব। আনহাতে, ভুৱা ‘লিগেচী ডাটা’ ব্যৱহাৰ কৰা লোকসকলৰ নামো এন আৰ চিৰ চূড়ান্ত খচৰাৰ পৰা বাদ পৰিব।
‘ডি’ ভোটাৰসকলৰ নামসমূহ ‘হোল্ড’ হৈ থাকিব আৰু তেওঁলোকক বিদেশী ন্যায়াধীকৰণে বিদেশী নহয় বুলি ৰায় দিয়াৰ পিছতহে পৰৱৰ্তী পৰ্যায়ত তেওঁলোকৰ নাম এন আৰ চিত অন্তৰ্ভুক্ত কৰা হ’ব। তদুপৰি, প্ৰথম খচৰাত অহা নাম চূড়ান্ত খচৰাও কটা যাব পাৰে যদিও উপযুক্ত নথি-পত্ৰৰ সহায়ত পৰৱৰ্তী পৰ্যায়ত সেই নাম অন্তৰ্ভুক্ত কৰিব পাৰিব।
উপায়ুক্ত গৰাকীয়ে জানিবলৈ দিয়া অনুসৰি তথ্যৰ অভাৱত বহু লোকৰ নাম নাগৰিকপঞ্জীত নাহিব পাৰে যদিও প্ৰকৃত ভাৰতীয় নাগৰিকসকলে ভয় খাব লগাৰ কোনো কাৰণ নাই। উপায়ুক্তগৰাকীয়ে ৰাইজক শান্তি-শৃংখলা বজাই ৰাখিবলৈয়ো আহ্বান জনাইছে।
