অসমত উন্নীতকৰণ হৈ থকা ৰাষ্ট্ৰীয় নাগৰিকপঞ্জীৰ অহা ৩০ জুলাইত প্ৰকাশ হ’ব লগীয়া পূৰ্ণাংগ খচৰাখন প্ৰকাশৰ সময়ত ৰাজ্যত সৃষ্টি হ’ব পৰা পৰিস্থিতিক লৈ উদ্বিগ্ন হৈ আছে ৰাজ্য আৰু কেন্দ্ৰীয় চৰকাৰ। বহু সংখ্যক বিদেশী আৰু সন্দেহজনক বিদেশীৰ নাম কৰ্তনৰ সম্ভাৱনা থকাৰ পৰিপ্ৰেক্ষিতত স্ফুলিংগসদৃশ আইন-শৃংখলাজনিত পৰিস্থিতিৰ সৃষ্টি হ’ব পাৰে বুলি ইতিপূৰ্বে চোৰাংচোৱাৰ সূত্ৰবোৰে সতৰ্ক কৰি দিছে।
উল্লেখযোগ্য যে ৰাষ্ট্ৰীয় নাগৰিকপঞ্জীৰ দ্বিতীয় তথা চূড়ান্ত খচৰাখন যোৱা ৩০ জুনত প্ৰকাশ পোৱাৰ কথা আছিল যদিও ৰাজ্যৰ কিছু অংশত বান হোৱা বাবে কাম বিঘ্নিত হোৱা বুলি যুক্তি দেখুওৱাত উচ্চতম ন্যায়ালয়ে ইয়াক প্ৰকাশৰ বাবে আন এমাহ সময় দিয়ে।
সেই হিচাপত অহা ৩০ জুলাইত দ্বিতীয় খচৰাখন প্ৰকাশ হোৱাটো নিশ্চিত। এই সময়ছোৱাত ৰাজ্যত সৃষ্টি হ’ব পৰা পৰিস্থিতিক লৈ উদ্বিগ্ন হৈ পৰা কেন্দ্ৰীয় গৃহ মন্ত্ৰ্যালয়ে পৰিস্থিতি পৰ্যালোচনা কৰাৰ বাবে আজি নতুন দিল্লীত আয়োজন কৰিছে এখন বিশেষ বৈঠকৰ।
নৰ্থ ব্লকত অনুষ্ঠিত হ’বলগীয়া এই বৈঠকত ৰাজ্যৰ মুখ্য সচিব টি ৱাই দাস, আৰক্ষী সঞ্চালক প্ৰধান কুলধৰ শইকীয়া, গৃহ আয়ুক্ত এল এছ চাংচনৰ উপৰি কেন্দ্ৰীয় গৃহ দপ্তৰৰ উত্তৰ-পূবৰ দায়িত্বত থকা যুটীয়া সচিব সত্যেন্দ্ৰ গাৰ্গৰ লগতে কেন্দ্ৰীয় চোৰাংচোৱা বিভাগৰ শীৰ্ষ বিষয়াসকল উপস্থিত থাকিব বুলি জানিব পৰা গৈছে।
বৈঠকত ৰাজ্যৰ নিৰাপত্তা সন্দৰ্ভত বিতংভাৱে আলোচনা কৰা হ’ব। কেইবাটাও কাৰণত আজি অনুষ্ঠিত হ’ব লগীয়া বৈঠকখন বিশেষ গুৰুত্বপূৰ্ণ হিচাপে বিবেচিত হৈছে।
