এন আৰ চি আংশিক খচৰা প্ৰকাশ সন্দৰ্ভত ছাত্ৰ সংগঠনৰে আলোচনাত বহিল ডিব্ৰুগড় জিলা প্ৰশাসন 

ৰাষ্ট্ৰীয় নাগৰিক পঞ্জীৰ প্ৰথমখন খচৰা প্ৰকাশলৈ মাত্ৰ কেইটামান দিন বাকী থকা অৱস্থাত ডিব্ৰুগড় জিলাত কোনো বিভ্ৰান্তিকৰ পৰিৱেশৰ সৃষ্টি নহ’বৰ বাবে জিলা প্ৰশাসনে কিছু কাৰ্য পন্থা হাতত লোৱা পৰিলক্ষিত হৈছে। আংশিকভাবে প্ৰকাশ হ’বলগীয়া খচৰা ৰাষ্ট্ৰীয় নাগৰিকপঞ্জী সন্দৰ্ভত কালি ডিব্ৰুগড় জিলাৰ বিভিন্ন ছাত্ৰ সংগঠনৰে জিলা প্ৰশাসনে এক আলোচনাত মিলিত হয়। অহা ৩১ ডিচেম্বৰৰ মাজনিশা প্ৰকাশ পাবলগীয়া ৰাষ্ট্ৰীয় নাগৰিক পঞ্জীৰ আংশিক খচৰাৰ পৰা কোনো ব্যক্তিৰ নাম বাদ পৰিলেও তেওঁলোক শংকিত হোৱাৰ প্ৰয়োজন নাই বুলি উক্ত মত বিনিময় অনুষ্ঠানত জিলা উপায়ুক্ত লয়া মাদ্দুৰীয়ে কয়। ৩১ ডিচেম্বৰৰ মাজনিশা আংশিক খচৰা এন আৰ চি প্ৰকাশিত হোৱাৰ পিছত পহিলা জানুৱাৰীৰ পুৱা ৮ বজাৰ পৰা জিলাখনত থকা ৯৭ টা এন আৰ চি সেৱা কেন্দ্ৰত উক্ত এন আৰ চিৰ আংশিক খচৰা ৰাইজৰ বাবে উপলব্ধ কৰোৱা হ’ব । গতিকে প্ৰতিজন ব্যক্তিয়ে নিজৰ নাম এন আৰ চিত অন্তৰ্ভুক্ত হৈছেনে নাই, সেয়া নিজ নিজ এলেকাৰ এন আৰ চি সেৱা কেন্দ্ৰত বা অনলাইনযোগে 21 টা ডিজিটৰ আবেদন প্ৰাপ্তিৰ নম্বৰ( এন আৰ চি )ৰ সহায়ত www.nrcassam.nic.in, www.assam.mygov.in, www.assam.gov.in  আৰু  www.homeandpolitical.assam.gov.in  ৱেবছাইটৰ যোগেদি পৰীক্ষা কৰিব পাৰিব । ইফালে ডিব্ৰুগড় জিলা প্ৰশাসনৰ তৰফৰ পৰা ৰাইজৰ সুবিধাৰ্থে  কন্ট্ৰল ৰূম মুকলি কৰি তাত এটা 0373–2312940 হেল্পলাইন নম্বৰৰ ব্যৱস্থা কৰা বুলিও জনায়।

এই মতবিনিময় সভাত ডিব্ৰুগড়ৰ বিভিন্ন ছাত্ৰ সংগঠনৰ উপৰি অতিৰিক্ত উপায়ুক্ত অংকুৰ ভঁৰালীও উপস্থিত থাকে । সম্পূৰ্ণ এন আৰ চি খচৰা প্ৰকাশ হোৱাৰ পিছতহে ব্যক্তি বিশেষকৰ কিবা ওজৰ আপত্তি থাকিলে গ্ৰহণ কৰা হ’ব বুলি মতবিনিময় অনুষ্ঠানত উপায়ুক্ত গৰাকীয়ে জানিবলৈ দিয়ে ।