কমনৱেলথ গে’মছত পদক আৰ্জনত ব্যৰ্থ অসমৰ হিমা, আগবঢ়ালে ব্যক্তিগত সৰ্বশ্ৰেষ্ঠ প্ৰদৰ্শন

চলি থকা কমনৱেলথ গে’মছত নিজৰ পূৰ্বৰ ৰেকৰ্ড ভংগ কৰি সৰ্বশ্ৰেষ্ঠ প্ৰদৰ্শন আগবঢ়োৱাৰ পিছতো পদক অৰ্জন কৰিব নোৱাৰিলে অসমৰ হিমা দাস। আজি ১১ এপ্ৰিলত অষ্ট্ৰেলিয়াৰ গ’ল্ড ক’ষ্টত অনুষ্ঠিত মহিলাৰ ৪০০ মিটাৰ দৌৰ সম্পূৰ্ণ কৰিবলৈ হিমাই লয় ৫১.৩২ ছেকেণ্ড।

পদক অৰ্জন কৰিব নোৱাৰিলেও কমনৱেলথ গে’মছৰ ‘ট্ৰেক ইভেণ্ট’ৰ ব্যক্তিগত শাখাৰ ফাইনেলত প্ৰৱেশ কৰা প্ৰথম ভাৰতীয় মহিলাৰূপে পৰিগণিত হয় অসমৰ ১৮ বছৰীয়া হিমা।

উল্লেখযোগ্য যে প্ৰতিবাৰেই নিজৰ পূৰ্বৰ প্ৰদৰ্শনতকৈ উন্নত প্ৰদৰ্শন কৰা হিমাই ছে’মি ফাইনেলত ৫১.৫৩ ছেকেণ্ডত দৌৰ সম্পূৰ্ণ কৰিছিল যিটো কালিলৈকে আছিল তেওঁৰ ব্যক্তিগত শ্ৰেষ্ঠ।

হিমাই ৮ গৰাকী প্ৰতিযোগীৰ ভিতৰত তৃতীয় স্থান লৈ ফাইনেলত প্ৰৱেশ কৰিছিল। প্ৰথম আৰু দ্বিতীয় স্থানৰ প্ৰতিযোগীকেইগৰাকীয়ে সময় লৈছিল ক্ৰমে ৫১.০৮ আৰু ৫১.২৬ ছেকেণ্ড।