কলকাতাৰ পৰা ওভতাৰ পথত ৰে’লৰ মজিয়াতে শুবলৈ বাধ্য কৰা হ’ল আইজল এফ চিৰ খেলুৱৈক
সমগ্ৰ দেশতে নাম থকা আইজল ফুটবল ক্লাবৰ ১৯ অনূৰ্ধ্ব ১৮গৰাকী খেলুৱৈয়ে কলকাতাৰ পৰা গুৱাহাটীলৈ আহি থকা পথত ৰে’লৰ মজিয়াতে শুব লগীয়া হোৱাৰ দৰে দুৰ্ভাগ্যজনক ঘটনাই সকলোৰে চকু কপালত তুলিছে। জানিব পৰা মতে তেওঁলোকৰ হাতত কনফাৰ্ম টিকট নাছিল। এইদৰেই আইজলৰ ফুটবল দলৰ খেলুৱৈসকলে কলকাতাৰ পৰা ১৬ ঘণ্টীয়া ৰে’ল যাত্ৰা কৰিব লগীয়া হৈছে। তেওঁলোকে মহানগৰখনত জুনিয়ৰ টুৰ্নামেণ্ট এখনত খেলি ঘৰলৈ বুলি উভতি আহিছিল।
দিনটো প্ৰতিযোগিতাত খেল খেলি ক্লান্ত হৈ পৰা ফুটবল খেলুৱৈকেইগৰাকীয়ে শনিবাৰে ৰে’লত উঠিহে গম পায় যে তেওঁলোকৰ কনফাৰ্ম টিকট নাই।
এই যুৱ খেলুৱৈ কেইগৰাকীয়ে গোটেই বাট মজিয়াত শুই আহিবলৈ বাধ্য হৈছিল। কেইজনমানে আনকি আসনৰ তলত শুইছিল আৰু বাকী বিলাকে সাময়িকভাৱে খালী হোৱা আসনত বহি জিৰণি লৈছিল যদিও সংৰক্ষিত আসনৰ যাত্ৰী আহি পোৱাৰ লগে লগে তাৰ পৰাও উঠি দিব লগীয়া হৈছিল।
‘’কিছুমান খেলুৱৈয়ে ঘণ্টাৰ পিছত ধৰি ঘণ্টা থিয় হৈ আহিছিল আৰু আনকি জিৰণি ল’বলৈকো কোনো আসন বিচাৰি পোৱা নাছিল। কিছুমানে শৌচাগাৰৰ কাষতে শুই দিছিল,’’- ৰে’লখনৰ এগৰাকী যাত্ৰীয়ে এইদৰে কয়।
সংশ্লিষ্ট বিষয়াসকলে খেলুৱৈসকলৰ প্ৰতি দেখুওৱা অসন্মান তথা দায়িত্বহীনতাৰ নমুনাই ছ’চিয়েল মিডিয়াত ইতিমধ্যে প্ৰতিক্ৰিয়াৰ সৃষ্টি কৰিছে।
খেলুৱৈ কেইগৰাকীৰ দুৰ্দশাৰ কিছু ছবি আপলোড কৰা ঋষিত মিত্ৰই কয় যে সংশ্লিষ্ট বিষয়াসকলে প্ৰদৰ্শন কৰা উদাসীনতাত তেওঁ আচৰিত হৈ পৰিছিল।
‘সংৰক্ষণ নাই, আসন নাই আৰু ভৱিষ্যতৰ নায়কসকলে শৌচাগাৰৰ কাষত স্থান পাইছে। ১৮ গৰাকী খেলুৱৈ ইপিনে-সিপিনে সিঁচৰতি হৈ পৰি আছে। এনেকৈয়ে আমাৰ ভাৰতীয় ফুটবলৰ বিকাশ হ’ব ? আমি যদি তেওঁলোকক বুনিয়াদী সুবিধাখিনিয়ে দিব নোৱাৰো কিয় এটি শিশুৱে ফুটবল খেলাৰ সপোন দেখিব?’’ –মিত্ৰই ফেচবুকত এনেদৰে লিখিছে।
‘’মই নাজানো এয়া বিষয়াসকলৰ নে আয়োজক কমিটিৰ ভুল, কিন্তু এই ল’ৰাবোৰৰ দুৰ্দশাগ্ৰস্ত অৱস্থাটো দেখি মই দুখ পাইছো,’’-তেওঁ লিখিছে।
‘’তেওঁলোকৰ যথেষ্ট আত্মসন্মান আৰু মৰ্যাদা আছে। সেয়েহে তেওঁলোকৰ কেইজনমানে মোৰ আসনখন আগবঢ়াই দিওঁতে ভদ্ৰভাৱে অস্বীকাৰ কৰিছিল কিয়নো তেওঁলোকৰ সতীৰ্থসকলে বহিবলৈ কোনো আসন পোৱা নাছিল।‘’
‘’ভাৰতৰ ফুটবল গোষ্ঠীৰ এইয়া লজ্জাজনক,’’-তেওঁৰ প’ষ্টত মিত্ৰই উল্লেখ কৰিছে।
মিজোৰামৰ আইজল এফ চি দলটো ১৯৮৪ চনত গঠন হৈছিল আৰু ২০১৫ ৰ আই-লীগৰ দ্বিতীয় ডিভিজনত বিজয়ী হোৱাৰ পিছত ২০১৫-১৬ত ভাৰতৰ শীৰ্ষ পৰ্যায়ৰ লীগ আই-লীগত প্ৰৱেশৰ সুযোগ লাভ কৰিছিল।