শেহতীয়াকৈ বিশ্বজয়ৰ গৌৰৱ অৰ্জন কৰা স্পেইনৰ তাৰকা মিডফিল্ডাৰ মাৰ্ক কুকুৰেয়াই খেলপথাৰত তেওঁৰ দীঘল কোঁচকৰা চুলি নাবান্ধি খোলাকৈ ৰখাৰ এক বিশেষ আৱেগিক কাৰণ পোহৰলৈ আহিছে। এক শেহতীয়া প্ৰতিবেদন অনুসৰি, কুকুৰেয়াই তেওঁৰ সাত বছৰীয়া অটিজমত আক্ৰান্ত পুত্ৰ মাতেওৰ সুবিধাৰ্থে এই পদক্ষেপ গ্ৰহণ কৰে, যাতে দৰ্শকৰ আসনৰ পৰা খেল উপভোগ কৰি থকা সময়ত পুত্ৰই পিতৃক সহজেই চিনাক্ত কৰিব পাৰে। খেলপথাৰত নামিলেই তেওঁৰ কোঁচকৰা চুলি ব্যতিক্ৰমীভাৱে চকুত পৰে আৰু বৰ্তমান এই কেশসজ্জা তেওঁৰ ব্যক্তিত্বৰ এক অবিচ্ছেদ্য অংশ হৈ পৰিলেও ইয়াৰ আঁৰত তেওঁৰ পুত্ৰৰ বিশেষ ভূমিকা নিহিত হৈ আছে।
কুকুৰেয়া আৰু তেওঁৰ সংগী ক্লডিয়া ৰড্ৰিগেজে পূৰ্বতেই ৰাজহুৱাভাৱে প্ৰকাশ কৰিছিল যে তেওঁলোকৰ জ্যেষ্ঠ পুত্ৰ মাতেও অটিজমত আক্ৰান্ত। পুত্ৰৰ এই অৱস্থাৰ বিষয়ে জানিব পৰাৰ পিছত সমগ্ৰ পৰিয়ালটোৱেই এক নতুন বাস্তৱক আঁকোৱালি ল’বলগীয়া হয়। ক্লডিয়াই উল্লেখ কৰা অনুসৰি, প্ৰথম অৱস্থাত পৰিস্থিতি চম্ভালিবলৈ তেওঁলোকৰ যথেষ্ট অসুবিধা হৈছিল যদিও পৰৱৰ্তী সময়ত পুত্ৰৰ প্ৰয়োজনীয়তা বুজি উঠি স্কুল, থেৰাপী আৰু দৈনন্দিন কাৰ্যসূচী নতুনকৈ সজাই তোলা হয়। আনকি পৰিয়ালৰ ভ্ৰমণৰ আঁচনিসমূহো মাতেওৰ সুবিধাৰ প্ৰতি লক্ষ্য ৰাখি সলনি কৰা হৈছিল। পুত্ৰৰ সৈতে থকা এই অভিজ্ঞতাসমূহ বৰ্ণনা কৰিবলৈ গৈ কুকুৰেয়াকো একাধিকবাৰ আৱেগিক হৈ পৰা পৰিলক্ষিত হৈছে।
এই সন্দৰ্ভত মনোবিদ আত্রেয়ী ভট্টাচাৰ্যই মত প্ৰকাশ কৰি কয় যে অটিজম হৈছে এক বিশেষ স্নায়বিক পৰিস্থিতি বা নিউৰোডেভেলপমেণ্টেল কণ্ডিচন, যাৰ সূত্ৰপাত মানুহ ভ্ৰূণ অৱস্থাত থাকোঁতেই ক্ৰমজমৰ কিছু পৰিৱৰ্তনৰ জৰিয়তে আৰম্ভ হয়। মনোবিদগৰাকীয়ে লগতে কয় যে অটিজমত আক্ৰান্ত শিশুৰ সামাজিক ভাষাৰ বিকাশ বাধাপ্ৰাপ্ত হয়, যাৰ ফলত তেওঁলোকে কেতিয়াবা নিজৰ চাৰিওফালৰ পৰিৱেশটোৰ বিষয়ে বিভ্ৰান্তিত ভুগিব পাৰে। নিজৰ পিতৃ-মাতৃৰ পৰিচয় বা নিজৰ অৱস্থানৰ দৰে সাধাৰণ বিষয়সমূহ বুজিবলৈ তেওঁলোকে সংগ্ৰাম কৰিবলগীয়া হ’ব পাৰে। সেয়েহে খেলপথাৰত কুকুৰেয়াই চুলি বান্ধি ল’লে নিজৰ সুবিধা হ’ব যদিও পুত্ৰৰ স্বাৰ্থত তেওঁ চুলিত কোনো পৰিৱৰ্তন নানে। একে ৰঙৰ জাৰ্ছী পৰিধান কৰা খেলুৱৈসকলৰ মাজত নিজৰ পিতৃক বিচাৰি উলিওৱাত যাতে মাতেওৰ কোনো কষ্ট নহয়, তাৰ বাবেই এই পদক্ষেপ গ্ৰহণ কৰা হৈছে বুলি বিশেষজ্ঞসকলে মত প্ৰকাশ কৰিছে।
নিজৰ সন্তানৰ অটিজমৰ বিষয়ে মুকলিকৈ আলোচনা কৰি মাৰ্ক কুকুৰেয়া বৰ্তমান বহুতো পৰিয়ালৰ বাবে সাহসৰ এক আদৰ্শ হৈ পৰিছে। বিশেষজ্ঞসকলৰ মতে, অটিজম কোনো ৰোগ নহয়, বৰঞ্চ ই স্নায়বিক বিকাশৰ এক ভিন্ন ধৰণহে। সঠিক সময়ত মূল্যায়ন, উপযুক্ত সাহায্য, থেৰাপী আৰু পৰিয়ালৰ অপৰিসীম ধৈৰ্য তথা মৰম লাভ কৰিলে অটিজমত আক্ৰান্ত শিশুৱেও নিজৰ গতিৰে স্বাভাৱিক বিকাশ লাভ কৰিবলৈ সক্ষম হয়। কুকুৰেয়াৰ এই পদক্ষেপে বিশেষভাৱে সক্ষম শিশুৰ প্ৰতি অভিভাৱকৰ দায়িত্ববোধৰ এক সুন্দৰ নিদৰ্শন দাঙি ধৰিছে।
