প্ৰথমগৰাকী অসমীয়া মহিলা পৰ্বতাৰোহণকাৰী হিচাপে গৌৰৱ কঢ়িয়াই আনিলে অসম কন্যা মন্তি ৰাজখোৱাই। ভাৰতীয় তেল আৰু প্ৰাকৃতিক গেছ নিগম (অ’ এন জি চি)ৰ কাৰ্যবাহী অভিযন্তাৰূপে মুম্বাইত কৰ্মৰত মন্তি ৰাজখোৱাই দেওবাৰে পুৱা সু-উচ্চ শৃংগ ৰূপালী কাঞ্চনজংঘাত অসমৰ আভা বিয়পাই অভিলেখ সৃষ্টি কৰিবলৈ সক্ষম হয়।
উল্লেখ্য যে বিশ্বৰ সৰ্বোচ্চ মাউণ্ট এভাৰেষ্টৰ তুলনাত অধিক বিপদশংকুল ৰূপে পৰিচিত কাঞ্চনজংঘাৰ উচ্চতা হৈছে ৮,৫০৬ মিটাৰ। অ’ এন জি চিৰ এটা পাঁচজনীয়া পৰ্বতাৰোহণকাৰী দলৰ সৈতে যোৱা মন্তি ৰাজখোৱা হৈছে দলটোৰ একমাত্ৰ মহিলা সদস্য।
ভাৰত আৰু নেপালৰ সীমান্তত অৱস্থিত বৰফৰ শুভ্ৰ চাদৰেৰে আৱৰি ৰখা কাঞ্চনজংঘা আহোৰণ কৰা অসমৰ প্ৰথমগৰাকী মহিলা আৰোহণকাৰী মন্তি ৰাজখোৱাই বিশেষ সফলতা অৰ্জন কৰাৰ পাছত উৎফুল্লিত হৈ পৰা পৰিলক্ষিত হয়।
উল্লেখ্য যে মহানগৰীৰ শ্ৰীমন্ত শংকৰদেৱ একাডেমিৰ পৰা দ্বাদশ শ্ৰেণী উত্তীৰ্ণ হৈ ৰাজখোৱাই অভিযান্ত্ৰিক পাঠ্যক্ৰম গ্ৰহণ কৰাৰ পাছত অ’ এন জি চিৰ চাকৰিত যোগদান কৰে। চাকৰিৰ ব্যস্ততাৰ মাজতো তেওঁ পৰ্বতাৰোহণৰ চৰ্চা অব্যাহত ৰাখিছিল।
বিগত বৰ্ষত ৮,৮৫০ মিটাৰ উচ্চতাৰ মাউণ্ট এভাৰেষ্টৰ চাৰি নম্বৰ বেছ কেম্পলৈকে যাবলৈ সক্ষম হোৱা ৰাজখোৱাই দেওবাৰে কাঞ্চনজংঘা আৰোহণ কৰি অসমলৈ গৌৰৱ কঢ়িয়াই অনাৰ লগতে তেওঁৰ এই সাফল্যৰ বাবে দুঃসাহসিক ক্ৰীড়া সংগঠন এক্সপ্ল’ৰাৰ্ছৰ কাৰ্যকৰী সভাপতি তথা বিশিষ্ট সাংবাদিক প্ৰণয় বৰদলৈয়ে অভিনন্দন জ্ঞাপন কৰে।
