কাৰ্বি আংলঙৰ নৃশংস ঘটনাক লৈ প্ৰতিক্ৰিয়া জুবিনৰ

‘অসমৰ সকলো পৰিস্থিতিৰে ৰাজনৈতিক উদ্দেশ্য আছে। সাম্প্ৰদায়িক ৰূপ দিয়াৰ চেষ্টা চলোৱা হয়। তাৰ পৰা সাৱধান থাকক।’ কাৰ্বি আংলঙৰ দকমকাত ‘সোপাধৰাৰ সন্দেহত’ নীলোৎপল দাস আৰু অভিজিৎ নাথ নামৰ দুজন যুৱকক উন্মত্ত লোকৰ দলে হত্যা কৰাৰ ঘটনাটোৱে ৰাজ্যজুৰি তীব্ৰ প্ৰতিক্ৰিয়া সৃষ্টি কৰাৰ পিছত অসমৰ ৰাইজলৈ এই সাৱধানবাণী জুবিন গাৰ্গৰ।

‘আমি একেলগে জীয়াই থাকিব লাগিব আৰু একেলগে মৰিব লাগিব’ বুলিও তেওঁ অসমৰ সকলো জনজাতি, বৰ্ণ, সম্প্ৰদায়ক আহ্বান জনাইছে।

কাৰ্বি আংলঙৰ বীভৎস ঘটনাটোৰ লগতে ‘সোপাধৰাৰ’ ভুৱা বাতৰিৰ পিছত ৰাজ্যৰ হোজাইৰ যমুনামুখ, বিশ্বনাথ চাৰিআলি, শিৱসাগৰৰ চৰাইদেউ, লখিমপুৰৰ নাৰায়ণপুৰ আদি বিভিন্ন ঠাইত আতংকিত ৰাইজে ‘সন্দেহজনক সোপাধৰাক’ আক্ৰমণ কৰাৰ বিভিন্ন ঘটনা ঘটিছে।

কিন্তু কাৰ্বি আংলঙৰ ঘটনাটোৰ আলম লৈ বিভিন্নজনে কাৰ্বি আৰু জনজাতীয়সকলৰ বিৰুদ্ধে বিদ্বেষমূলক মন্তব্য আগবঢ়োৱা পৰিলক্ষিত হৈছে।

ঘটনাটোৱে তীব্ৰ মানসিক আঘাত দিয়া বুলি আজি ১০ জুনত ফে’ছবুকত উল্লেখ কৰিছে জুবিন গাৰ্গে। ‘মই কালি মন্তব্য নকৰিলো। কাৰণ মানসিক আঘাতৰ পৰা মই সুস্থিৰ হৈ উঠিব পৰা নাছিলো,’ তেওঁ  কয়।

জুবিনে কয় ‘মোৰ দৌৰি পলাই যাম যেন লাগিছে। কিন্তু যাব নোৱাৰো। কাৰণ আমি একেলগে যুঁজিব লাগিব।’

‘পৰিস্থিতিটো বৰ কৰুণ’ বুলি মন্তব্য কৰি জুবিনে কয় ‘সংগীত, চিনেমা কৰি কি লাভ? মোৰ দৌৰি পলাই যাম যেন লাগিছে।’

তেওঁ অপৰাধীৰ কঠোৰ শাস্তিৰো দাবী জনাইছে।

আনহাতে ঘটনাথলীত উপস্থিত এজন আৰক্ষীয়ে ভিডিঅ’ কৰি থকাৰ কথাটোতো ‘তেওঁ ভিডিঅ’ কৰিব লাগিছিল নে বচাব লাগিছিল’ বুলি প্ৰশ্ন কৰিছে।