পাটাছাৰকুছি আৰক্ষী থানাৰ ভাৰপ্ৰাপ্ত বিষয়া বিৰেন কলিতা আৰু পাঠশালা চকীৰ পাৰ্থ প্ৰতিম বিশ্বাসৰ নেতৃত্বত যোৱা বজালী আৰু বৰমা আৰক্ষীৰ এক যুটীয়া অভিযানকাৰী দলে গ্ৰেপ্তাৰ কৰিবলৈ সক্ষম হয় ধৰ্ষণত অভিযুক্ত এজন পাষণ্ডক।
গ্ৰেপ্তাৰ হোৱা অভিযুক্ত ধৰ্ষণকাৰীজনক অধয় মালাকৰ(৪৫) বুলি আৰক্ষীয়ে জানিবলৈ দিয়ে। লক্ষ্যণীয় যে ফাৰ্ণিচাৰৰ ব্যৱসায় চলোৱা মালাকৰে ওচৰৰে নিবাসী নাবালিকা কিশোৰী এজনীক বলপূৰ্বকভাবে বলাৎকাৰ কৰাৰ অভিযোগত অভিযুক্ত।
কিশোৰীজনীৰ পৰিয়ালৰ লোকে দাখিল কৰা এফ আই আৰৰ ভিত্তিতে কালি অভিযুক্ত অধয়ক বাকসা জিলাৰ বৰমাৰ পৰা আৰক্ষীৰ অভিযানকাৰী দলটোৱে গ্ৰেপ্তাৰ কৰিবলৈ সক্ষম হয়।
ধৰ্ষণৰ বলি হোৱা কিশোৰীজনীৰ পৰিয়ালৰ সদস্যই জানিব দিয়ে যে যোৱা ১২ ফেব্ৰুৱাৰিৰ দিনা সন্ধিয়া প্ৰায় ৭ মান বজাত কিশোৰীজনীৰ দেউতাকক বিছাৰি বাহিৰলৈ ওলাই গৈছিল। আৰু তেতিয়াই অধয় মালাকৰে কিশোৰীজনীৰ অকলে পাই বলপূৰ্বকভাবে ফাৰ্ণিচাৰ দোকানৰ পিছফালে লৈ যায় ধৰ্ষণৰ দৰে কু-কৰ্ম সংঘটিত কৰে।
উল্লেখ্য যে পাষণ্ড অধয়ে কিশোৰীজনীক এই কু-কৰ্মৰ বিষয়ে কাৰোৰে আগত প্ৰকাশ নকৰিবলৈ কয়। যদিহে এই কথা কৰোবাৰ আগত প্ৰকাশ কৰে তেন্তে লম্পট মালাকৰে কিশোৰীজনীৰ নগ্ন ফটো ৰাজহুৱা কৰাৰো ভাবুকি প্ৰদান কৰে।
কিন্তু কিশোৰীজনী ঘৰলৈ আহি সকলো কথা পৰিয়ালৰ আগত প্ৰকাশ কৰাৰ পাছতে স্থানীয় ৰাইজে ঘটনাৰ উমান পায় উত্তেজিত হৈ পৰে। আৰু মালাকৰৰ ফাৰ্ণিচাৰৰ দোকান ভাঙি চূৰ্ণ বিচূৰ্ণ কৰে। পৰিস্থিতি ভয়ংকৰ হোৱা দেখি মালাকৰে ঘটনাস্থলীৰ পৰা পলায়ন কৰিবলৈ সক্ষম হয়।
এই অমানৱীয় কাণ্ড সংঘটিত কৰা অধয় মালাকৰক শীঘ্ৰে গ্ৰেপ্তাৰৰ দাবীত বিভিন্ন দল তথা ছাত্ৰ সংগঠনে প্ৰতিবাদ সাব্যস্ত কৰা পৰিলক্ষিত হৈছিল।
লক্ষ্যণীয় যে ৰাইজৰ হেচাত আৰক্ষীয়ে অভিযুক্ত মালাকৰৰ সন্ধান তীব্ৰতৰ কৰি তোলে আৰু শুকুৰবাৰে নিশা বৰমাৰ পৰা অভিযুক্তকাৰীজনক গ্ৰেপ্তাৰ কৰে।
ধৰ্ষণৰ গোচৰত অভিযুক্ত মালাকৰক বৰ্তমান পাটাছাৰকুছি আৰক্ষী থানাত ৰখা হৈছে আৰু তদন্ত অব্যাহত ৰখা বুলি আৰক্ষীয়ে জানিবলৈ দিয়ে।
