কোকৰাঝাৰত ‘বডোফা’ উপেন ব্ৰহ্মৰ জন্ম দিৱস পালন; বঞ্চিত সম্প্ৰদায়ৰ ন্যায়্প্ৰাপ্তিৰ বাবে ঐক্যবদ্ধ আন্দোলনৰ নেতৃত্ব দিছিল ব্ৰহ্মই : এবছু

বডোফা উপেন্দ্ৰ নাথ ব্ৰহ্মৰ ৬২ সংখ্যক জন্ম দিৱস আজি কোকৰাঝাৰত পালন কৰা হয়। দতমাৰ থুলুংগাপুৰীত ব্ৰহ্মৰ সমাধিথলীত এবছুৱে আৰু বিটিচি সচিবালয়ে কোকৰাঝাৰৰ বডোফা নগৰ (Bodofa Nwgwr)ৰ বিটিচি সদনৰ সমুখত বডো নেতাগৰাকীৰ জন্ম দিৱস পালন কৰে।

বডোফাক সুঁৱৰি এবছুৰ সম্পাদক লৰেন্স ইছলাৰীয়ে কয় ‘বডোফাই পদদলিত লোকসকলৰ বাবে কাম কৰিছিল, তেওঁলোকৰ ক্ষেত্ৰত হোৱা অন্যায়ৰ বিৰুদ্ধে মাত মাতিছিল আৰু সুবিধাবঞ্চিত সম্প্ৰদায়সমূহৰ ন্যায়্প্ৰাপ্তিৰ বাবে সমগ্ৰ অঞ্চলটো কঁপাই যোৱা ঐক্যবদ্ধ আন্দোলনৰ নেতৃত্ব দিছিল।’

বডোফাৰ জন্ম দিৱস ‘ছাত্ৰ-ছাত্ৰীৰ দিন’ হিচাপে এবছুৱে পালন কৰি অহাৰ কথা উল্লেখ কৰি তেওঁলোকে বাৰম্বাৰ দাবী জনাই অহা সত্ত্বেও ৰাজ্য চৰকাৰ বা বিটিচি প্ৰশাসন কোনেও এই দিনটো বন্ধৰ দিনৰূপে ঘোষণা নকৰা বাবে ক্ষোভ প্ৰকাশ কৰে।

বড়ো আন্দোলনৰ চহিদসকলৰ বাবে অসম চৰকাৰে ৫ লাখকৈ টকা দিয়াৰ বাবে লোৱা সিদ্ধান্ত প্ৰশংসা কৰি এবছুৰ প্ৰাক্তন নেতা তথা ৰাজ্যসভাৰ প্ৰাক্তন সাংসদ উৰ্খাও গৌড়া ব্ৰহ্মই বিটিচি প্ৰশাসনে যোৱা ১৫ বছৰে বডোফাৰ পৰিয়ালটোক সাহায্য দিয়াত বিফল হোৱাতো দুৰ্ভাগ্যজনক বুলি অভিহিত কৰে।

আনহাতে বডোৰ লগতে আন পদদলিত লোকসকলৰ বাবে বডোফা পথ প্ৰদৰ্শক শক্তি আছিল আৰু শোষণ, দমন আৰু অন্যায়ৰ বিৰুদ্ধে তেওঁ এটা প্ৰজন্মৰ চকু মোকলাই গৈছিল বুলি মন্তব্য কৰি বিটিচিৰ উপ মুৰব্বী কাম্ফা বৰগয়াৰী্যে ব্ৰহ্মৰ জন্ম দিৱসত বন্ধ নিদিয়াৰ প্ৰসংগত কয় যে কথাটো ইতিমধ্যে পৰিষদত আলোচনা হৈছে। কিন্তু বডোফাৰ ‘জন্ম’ নে ‘মৃত্যু’ দিৱসতো বন্ধ দিয়া যায় সেয়া ঠিক কৰিব পৰা হোৱা নাই বুলি উল্লেখ কৰি নেতাজনে শীঘ্ৰে এই বিষয়তো পুনৰ আলোচনা কৰা হ’ব বুলি আশ্বাস দিয়ে।

বডোফা ইউ এন ব্ৰহ্ম ট্ৰাষ্টৰ অধ্যক্ষ ডঃ চুবুং বসুমতাৰীয়েও বডোফাৰ সমাধিত শ্ৰদ্ধাঞ্জলি জনায়।

১৯৫৬ চনৰ আজিৰ দিনটোতে জন্ম হোৱা এবছু তথা বড়ো আন্দোলনৰ নেতা উপেন্দ্ৰনাথ ব্ৰহ্মৰ ১৯৯০ চনৰ শ্ৰমিক দিৱসৰ দিনা তেজৰ কৰ্কট ৰোগত চিকিৎসাধীন অৱস্থাত মুম্বাইৰ টাটা মেম’ৰিয়েল চিকিৎসালয়ত মৃত্যু হৈছিল।

১৯৯০ চনৰ ৮ মে’ত তেওঁক ‘বডোফা’ (Father of the Bodos/ বডোসকলৰ পিতৃপুৰুষ) উপাধিৰে মৰণোত্তৰভাৱে সন্মান যচা হৈছিল।