গুৱাহাটীত শংকৰদেৱৰ জীৱন আৰু কৰ্মৰ আধাৰত স্থাপিত হ’ব সংগ্ৰহালয়

গুৱাহাটীৰ শ্ৰীমন্ত শংকৰদেৱ কলাক্ষেত্ৰত মহাপুৰুষ শ্ৰীমন্ত শংকৰদেৱৰ জীৱন আৰু কৰ্মৰ ওপৰত আধাৰিত এটা সংগ্ৰহালয় স্থাপন কৰাৰ প্ৰস্তাৱ আগবঢ়াইছে অসম চৰকাৰে।

এই প্ৰকল্পটোৰ দ্বাৰা বহুমুখী ব্যক্তিত্ব সম্পন্ন মহাপুৰুষ শ্ৰীমন্ত শংকৰদেৱ আৰু অসমীয়া সমাজ জীৱনলৈ তেওঁ আগবঢ়াই যোৱা অৱদানখিনিক এটা গাঁথনিগত ধৰণেৰে নৱপ্ৰজন্ম, দেশী আৰু বিদেশী দৰ্শকৰ আগত তুলি ধৰাৰ প্ৰয়াস কৰা হ’ব।

মুখ্য মন্ত্ৰী সোণোৱালে মঙলবাৰৰ এখন সভাত এই প্ৰকল্পটোৰ এটা পুনৰীক্ষণ কৰে।

‘’বিশ্বমানৱৰ সঁচা উদ্যম থকা শ্ৰীমন্ত শংকৰদেৱ বহুমুখী ব্যক্তিত্বৰ অধিকাৰী আছিল। তেওঁ মাত্ৰ এগৰাকী সংস্কৃতিৰ ৰসগ্ৰাহী বা ধৰ্মগুৰুৱেই নাছিল, তেওঁ আছিল এক অসামান্য ব্যক্তিত্ব। মহাপুৰুষজনাই অসমীয়া সমাজক গঢ় দিছিল।‘’ এই বুলি কৈ মুখ্য মন্ত্ৰী সোণোৱালে কয় যে সংগ্ৰহালয়ৰ প্ৰস্তাৱিত প্ৰকল্পটোৱে সেই সুউচ্চ ব্যক্তিত্বৰ অধিকাৰী মহাপুৰুষ শংকৰদেৱৰ গৌৰৱক প্ৰকাশ কৰিব।

মুখ্য মন্ত্ৰীয়ে সাংস্কৃতিক পৰিক্ৰমা বিভাগৰ বিষয়াসকলক মহাপুৰুষজনাৰ ব্যক্তিত্ব আৰু অৱদানৰ ওপৰত পৰ্যাপ্ত গৱেষণা কৰাৰ বাবে আৰু  আৰু সংগ্ৰহালয়টোৰ অন্তৰ্নিহিত ভাৱ প্ৰকাশ কৰিব পৰা গাঁথনিগত নক্সা প্ৰস্তুত কৰাৰ বাবে পৰামৰ্শ দিয়ে।

সাংস্কৃতিক পৰিক্ৰমা বিভাগৰ ৰাজ্যিক মন্ত্ৰী (ভাৰপ্ৰাপ্ত) নৱ কুমাৰ দলে, অতিৰিক্ত মুখ্য সচিব ভিবি প্যাৰেলাল, আয়ুক্ত আৰু সচিব প্ৰীতম শইকীয়া, মুখ্য মন্ত্ৰীৰ সচিব ৰঞ্জন চক্ৰবৰ্তী,  শ্ৰীমন্ত শংকৰদেৱ কলাক্ষেত্ৰ ছ’চাইটীৰ উপ সভাপতি সূৰ্য হাজৰিকা, প্ৰখ্যাত শিল্পী পুলক গগৈ, তপন ভট্টাচাৰ্য আৰু অন্যন্য সদস্যসকলে এই সভাখনত উপস্থিত আছিল।