কাকজান চাহ বাগিচাৰ যক্ষ্মাৰোগৰ পৰিস্থিতিৰ পৰিৱৰ্তন: জীৱন ৰক্ষা কৰিছে বহুতৰ

প্ৰতিটো পুৱা আৰম্ভ হয় টিবি স্ক্ৰীনিঙৰ সৈতে

প্ৰতি ৰাতিপুৱা প্ৰায় ৭ বজাত লেব টেকনিচিয়ান পদুম চুতীয়া নিজৰ মটৰচাইকেলেৰে যোৰহাট জিলাৰ কাকজান চাহ বাগিচাৰ কেন্দ্ৰীয় চিকিৎসালয়ত উপস্থিত হয়হি। তেওঁ গৈ পোৱালৈকে চাহ বাগিচাৰ শ্ৰমিকৰ এটা দীঘলীয়া শাৰী তেওঁৰ বাবে ৰৈ থাকে। যক্ষ্মা পৰীক্ষাৰ বাবে কফৰ (sputum) নমুনা দিবলৈ নিজৰ পাল অহালৈ অপেক্ষা কৰাৰ সময়ত বহুতেই নিজত মুখখন গামোচাৰে ঢাকি থয়।

তেওঁলোকৰ মাজৰেই আছিল “বিনু তাঁতী” (পৰিচয় গোপন ৰাখিবলৈ নাম সলনি কৰা হৈছে), এগৰাকী চাহ বাগিচাৰ শ্ৰমিক, যি ওজন কমা, ভোক লগা কমি যোৱা, সন্ধিয়া জ্বৰ উঠা আৰু কাহৰ লগত তেজ ওলোৱা আদি সমস্যাত ভুগি আছিল – যিবোৰ পালমোনাৰী যক্ষ্মা (pulmonary tuberculosis) ৰোগৰ সাধাৰণ লক্ষণ। কফ পৰীক্ষাৰ পিছত, তেওঁ ঔষধ সংবেদনশীল যক্ষ্মাৰোগত আক্ৰান্ত বুলি চিনাক্ত কৰা হয়।

ৰাষ্ট্ৰীয় যক্ষ্মা চিকিৎসা প্ৰট’কল অনুসৰি, চিকিৎসকে তেওঁক আইছ’নিয়াজিড, ৰিফামপিচিন, পাইৰাজিনামাইড আৰু ইথামবুটল (HRZE) ক সামৰি ৫৬ দিনৰ বাবে প্ৰাথমিক পৰ্যায়ৰ চিকিৎসা (intensive phase of treatment) আৰম্ভ কৰে। এই প্ৰাথমিক পৰ্যায় সফলতাৰে সম্পূৰ্ণ কৰাৰ পিছত আৰু শাৰীৰিক উন্নতি দেখাৰ পিছত, তেওঁক পৰৱৰ্তী পৰ্যায়লৈ স্থানান্তৰিত কৰা হয়, য’ত তেওঁক চিকিৎসকে নিৰ্ধাৰণ কৰা অনুসৰি আইছ’নিয়াজিড, ৰিফামপিচিন আৰু ইথামবুটল (HRE) প্ৰদান কৰা হয়।

চিকিৎসা সম্পূৰ্ণ কৰাৰ পিছত, বিনু সম্পূৰ্ণৰূপে সুস্থ হৈ উঠে। বৰ্তমান তেওঁ সুস্থ আৰু পৰিয়ালৰ সৈতে এক স্বাভাৱিক জীৱন অতিবাহিত কৰি আছে।

সহস্ৰাধিক শ্ৰমিক থকা এখন চাহ বাগিচা

কাকজান চাহ বাগিচা টাটা গ্ৰুপৰ অধীনস্থ এমালগামেটেড প্লান্টেচনছ প্ৰাইভেট লিমিটেড (APPL) ৰ মালিকানাধীন অন্যতম বৃহৎ চাহ বাগিচা।

এমালগামেটেড প্লান্টেচনছ ভাৰতৰ দ্বিতীয় বৃহত্তম চাহ উৎপাদনকাৰী। কোম্পানীটোৱে চিটিচি (CTC), অৰ্থডক্স, গ্ৰীণ আৰু অৰ্গেনিক চাহ উৎপাদন কৰে আৰু অসমৰ ২১ খন চাহ বাগিচা আৰু পশ্চিমবঙ্গৰ ডুৱাৰ্ছৰ ৪ খন বাগিচাৰ পৰা বাৰ্ষিক প্ৰায় ৪২ মিলিয়ন কিলোগ্ৰাম চাহ উৎপাদন কৰে। প্ৰতিখন বাগিচাৰ নিজস্ব চাহ উৎপাদন কাৰখানা আছে।

এই কোম্পানীটোত প্ৰায় ৩১,০০০ কৰ্মচাৰী আছে। প্ৰত্যক্ষ সংস্থাপনৰ উপৰিও ই অস্থায়ী আৰু পৰোক্ষ জীৱিকাৰ সুযোগ প্ৰদান কৰে আৰু কেঁচা চাহপাত সংগ্ৰহৰ বাবে বৃহৎ সংখ্যক ক্ষুদ্ৰ চাহ খেতিয়কৰ সৈতেও অংশীদাৰিত্ব আছে।

কেন্দ্ৰীয় চিকিৎসালয়ৰ ভিতৰত

বাগিচাৰ ভিতৰত যক্ষ্মা ৰোগ কেনেদৰে নিয়ন্ত্ৰণ কৰা হৈছে সেয়া বুজিবলৈ আমি কাকজান চাহ বাগিচাৰ কেন্দ্ৰীয় চিকিৎসালয় পৰিদৰ্শন কৰিছিলোঁ।

জ্যেষ্ঠ চিকিৎসা বিষয়া ডাঃ লোপা দাসে কয় যে ১৫-২০ বছৰ আগতে টিবিৰ প্ৰাদূৰ্ভাৱ বহুত বেছি আছিল কিন্তু ধাৰাবাহিক সজাগতা অভিযানৰ বাবে ই যথেষ্ট হ্ৰাস পাইছে।তেওঁ কয় “আমি প্ৰতি ১২ ৰ পৰা ১৭ দিনৰ মূৰে মূৰে বাগানৰ লাইনবোৰত সজাগতা শিবিৰৰ আয়োজন কৰো”। বাগান লাইনবোৰ হৈছে চাহ বাগিচাৰ ভিতৰত থকা আৱাসিক শ্ৰমিক কলনী য’ত বহুতো আদিবাসী শ্ৰমিক বাস কৰে।

চিকিৎসালয়খনে প্ৰতি বছৰে বিশ্ব যক্ষ্মা দিৱসত (২৪ মাৰ্চ) চাহ বাগিচাৰ শ্ৰমিক আৰু যক্ষ্মা ৰোগৰ পৰা আৰোগ্য লাভ কৰা লোকসকলক তেওঁলোকৰ অভিজ্ঞতাৰ বিষয়ে বিনিময় কৰিবলৈ আৰু সজাগতা বিয়পাবলৈ আমন্ত্ৰণ জনায়।

প্ৰতিজন ৰোগীৰ নিৰীক্ষণ

দ্ৰুত টিবি নিৰ্ণয়ৰ বাবে চিকিৎসালয়খনে এক নিৰ্দিষ্ট ট্ৰুনাট (TrueNat) মলিকিউলাৰ পৰীক্ষণ সুবিধা ৰাখিছে। লেব টেকনিচিয়ান পদুম চুতীয়াই যোৱা চাৰে চাৰি বছৰ ধৰি সংৰক্ষণ কৰি ৰখা কাকজান সংমণ্ডলৰ যক্ষ্মা ৰোগৰ অভিলেখ আমাক প্ৰদান কৰে।

যক্ষ্মা ৰোগীৰ ৰেকৰ্ড (২০২২–২৩)

যক্ষ্মা ৰোগীৰ ৰেকৰ্ড (২০২৩–২৪)

যক্ষ্মা ৰোগীৰ ৰেকৰ্ড (২০২৪–২৫)

যক্ষ্মা ৰোগীৰ ৰেকৰ্ড (২০২৫–২৬)

যক্ষ্মা ৰোগীৰ ৰেকৰ্ড (২০২৬–২৭)

টোকা: ২০২৬-২৭ বৰ্ষৰ তথ্য কেৱল জুন মাহলৈকেহে উপলব্ধ, সেয়েহে ‘চলিত বৰ্ষ’ৰ মুঠ তথ্য কেৱল এপ্ৰিল-জুনৰ বাবেহে।

পূৰ্বতে, কাকজান চাহ বাগিচাৰ পুৰণা লাইনক (Purona Line) এটা টিবি হটস্পট বুলি গণ্য কৰা হৈছিল। চিকিৎসালয় কৰ্তৃপক্ষই জনাই যে সঘন পৰিদৰ্শন, সজাগতা অভিযান, আগতীয়া চিনাক্তকৰণ আৰু চিকিৎসা পৰিস্থিতি আগৰ তুলনাত যথেষ্ট উন্নত হৈছে।

আগতীয়া চিনাক্তকৰণেই আটাইতকৈ ডাঙৰ আহিলা

স্বাস্থ্য কৰ্মীসকলে দুসপ্তাহতকৈ অধিক সময় ধৰি একেৰাহে কাহ, ওজন কমা, জ্বৰ, ৰাতি ঘাম ওলোৱা বা কাহৰ লগত তেজ ওলোৱা যিকোনো ব্যক্তিক লগে লগে কফ পৰীক্ষা কৰিবলৈ উৎসাহিত কৰে। নিয়মীয়া ক্ষেত্ৰ পৰিদৰ্শন, সাম্প্ৰদায়িক সজাগতা, পৰীক্ষণ আৰু নিৰৱচ্ছিন্ন চিকিৎসাৰ সমাহাৰে কাকজান চাহ বাগিচাৰ কাকজান সংমণ্ডলত টিবি নিয়ন্ত্ৰণ ব্যৱস্থা সুদৃঢ় কৰিছে।

(এই প্ৰতিবেদন ৰীচ্চ মিডিয়া ফেল’শ্বীপ ২০২৫-২৬ৰ অধীনত প্ৰকাশ কৰা হৈছে।)