গুৱাহাটীৰ গড়চুকত ৰক্তাক্ত হৈ অচেতন অৱস্থাত পৰি থকা মহিলাক উদ্ধাৰ
ৰাজ্যখনত মহিলাৰ বিৰুদ্ধে অপৰাধৰ ঘটনা বৃদ্ধি পোৱাৰ বাতৰি প্ৰকাশ পাই থকাৰ সময়তে সোমবাৰে দক্ষিণ গুৱাহাটীৰ গড়চুক আৰক্ষী থানাৰ অন্তৰ্গত গড়চুকৰ লাচিতগড় হাইস্কুলৰ ওচৰৰ পৰা আজি পুৱা অচেতন অৱস্থাত পৰি থকা এগৰাকী মহিলাক (৩৫) উদ্ধাৰ কৰা হৈছে। মহিলাগৰাকীক পিছত আৰক্ষীয়ে মণিকা দাস বুলি চিনাক্ত কৰিছে।
আৰক্ষীৰ সূত্ৰ মতে মুখত আঘাতৰ চিন থকা মহিলাগৰাকী উদ্ধাৰৰ সময়ত শৰীৰৰ ৰক্তাক্ত হৈ আছিল। তেওঁক ৰাইজে উদ্ধাৰ কৰি গুৱাহাটী চিকিৎসা মহাবিদ্যালয় হাস্পাতাললৈ প্ৰেৰণ কৰিছে।
গড়চুক আৰক্ষী থানাৰ নিচেই সমীপতে গড়চুকত পেলাই থৈ যোৱা যুৱতী গৰাকীক ধৰ্ষণ কৰাৰ সন্দেহ কৰা হৈছে।
আৰক্ষীয়ে চিকিৎসকৰ পৰা জানিব পাৰিছে মানুহগৰাকীৰ মুখত মদৰ গোন্ধ পোৱা গৈছে। আৰক্ষীয়ে জনোৱা মতে, মহিলাগৰাকীৰ স্বামীৰ নাম ফুকন দাস আৰু তেওঁৰ সৈতে তিনি-চাৰি বছৰ ধৰি সম্পৰ্ক নাছিল। মহিলাগৰাকীৰ ১৬/১৭ বছৰীয়া এজন পুত্ৰও আছে আৰু তেওঁ মাকৰ লগতে থাকে।
পুতেকে আৰক্ষীক জনোৱা মতে কালি ৰাতি ৮.৩০ মান বজাত তেওঁৰ মাক ফুৰিবলৈ ওলাই আহিছিল। তাৰ পিছত বহু সময়ৰ পিছতো ঘূৰি নোযোৱাত ৰাতি ১০ বজাত ফোন কৰে। তেতিয়া ফোনটো বাজিছিল যদিও ফোনটো ধৰা নাছিল মাকে। কিন্তু আকৌ ১২ বজাত ফোন কৰোঁতে ফোনটো ছুইচ্ছ অফ পায়। পিছত পুতেকে মোমায়েকলৈ ফোন কৰে। মোমায়েকৰ পৰামৰ্শমতে স্থানীয় আৰক্ষী থানাত খবৰ দিবলৈ পুৱা যাওঁতেই মাকক স্থানীয় লোকে উদ্ধাৰ কৰি গুৱাহাটী চিকিৎসা মহাবিদ্যালয় আৰু চিকিৎসালয়লৈ নিয়া বুলি জানিব পাৰে।
সম্প্ৰতি মহিলাগৰাকী চিকিৎসাধীন হৈ আছে আৰু অৰ্ধ চেতন অৱস্থাতে আছে।
আনহাতে, আন এটা একেধৰণৰ ঘটনাত বাক্সাত এগৰাকী যুৱতীক জনৈক ধনজিৎ তালুকদাৰ নামৰ এজন ব্যক্তিয়ে ধৰ্ষণ কৰাৰ অভিযোগ উত্থাপিত হৈছে। এখন বনাঞ্চলত যুৱতীগৰাকীক অভিযুক্তজনে ধৰ্ষণ কৰিছিল।
বিহু উদযাপনৰ মাজতে গুৱাহাটী মহানগৰীত এনেদৰে যুৱতীক ধৰ্ষণ কৰি থানাৰ ওচৰতে পেলাই থৈ যোৱাৰ ঘটনাই সকলোকে আচৰিত কৰি তুলিছে।