গোলাঘাটত আৰক্ষীয়ে ছাত্ৰ মুক্তিৰ ওপৰত চলোৱা আক্ৰমণৰ বিৰুদ্ধে গোচৰ দাখিল

মঙলবাৰে অসম আৰক্ষীয়ে বগীধলা কাণ্ডৰ প্ৰতিবাদ কৰিবলৈ অহা ছাত্ৰ মুক্তি সংগ্ৰাম সমিতিৰ কৰ্মীসকলৰ ওপৰত চলোৱা পুলিচি নিৰ্যাতনৰ বিৰুদ্ধে ৰাদ্যৰ সৰ্বত্ৰে চলি থকা ধিক্কাৰ আৰু গৰিহণাৰ মাজতে আৰক্ষীৰ বিৰুদ্ধে দুটাকৈ গোচৰ ৰুজু কৰা হৈছে। প্ৰাপ্ত তথ্য মতে উক্ত আক্ৰমণত নেতৃত্ব দিয়া গোলাঘাট জিলাৰ অতিৰিক্ত আৰক্ষী অধীক্ষক প্ৰাৰ্থপ্ৰতিম শইকীয়াৰ বিৰুদ্ধে গোলাঘাট সদৰ থানাত বুধবাৰে সংগঠনটোৰ সহ-সম্পাদক দেৱব্ৰত শইকীয়াই এক গোচৰ ৰুজু কৰাৰ বিপৰীতে একেটা দিনতে অসম আৰক্ষীৰ বিৰুদ্ধে পুলিচি নিৰ্যাতনৰ অভিযোগ আনি গুৱাহাটী বিশ্ব বিদ্যালয়ৰ গৱেষক ছাত্ৰ পঞ্চানন হাজৰিকাই মানৱ অধিকাৰ আয়োগত আন এক গোচৰ তৰে। উল্লেখযোগ্য যে ৰাজ্যখনত সময়ে সময়ে গণতান্ত্ৰীক প্ৰতিবাদকাৰীৰ ওপৰত চলি অহা আক্ৰমণে ৰাজ্যজুৰি এক ৰাষ্ট্ৰসন্ত্ৰাসৰ ৰূপ লৈছে। এনেধৰণৰ ‘ৰাষ্ট্ৰসন্ত্ৰাসৰ ঘটনাই মানৱ অধিকাৰ বিপন্ন কৰাৰ লগতে গণতান্ত্ৰীক চেতনাৰ হত্যা যজ্ঞ পাতিছে’ বুলি মন্তব্য কৰি পঞ্চানন হাজৰিকাই তেওঁৰ গোচৰ পত্ৰত কয় যে ১৯ ডিচেম্বৰত গোলাঘাটৰ আৰক্ষীয়ে নিৰস্ত্ৰ প্ৰতিবাদকাৰীৰৰ ওপৰত চলোৱা বৰ্বাৰ লাঠী চালনাই মানৱ অধিকাৰৰ সকলো প্ৰাথমিক চৰ্ত উলংঘা কৰিছে।