চতুৰ্থটো সাৰ উৎপাদন গোট নিৰ্মাণ নকৰাৰ প্ৰতিবাদত বিভিএফচিএলৰ কৰ্মচাৰীৰ প্ৰতাৰণা দিৱস

ব্ৰহ্মপুত্ৰ ভেলী ফাৰ্টিলাইজাৰ কৰ্প’ৰেশ্যন লিমিটেডৰ কৰ্মচাৰীসকলে আজি কাৰখানাটোৰ প্ৰৱেশদ্বাৰত প্ৰতাৰণা দিৱস পালন কৰে। কেন্দ্ৰীয় চৰকাৰে নামৰূপ সাৰ কাৰখানাৰ চতুৰ্থটো উৎপাদন গোট নিৰ্মাণ নকৰাৰ প্ৰতিবাদত এই প্ৰতিবাদী কাৰ্যসূচী পালন কৰে।

নামৰূপ সাৰ ফাৰ্টিলাইজাৰ শ্ৰমিক য়ুনিয়ন এণ্ড ফাৰ্টিলাইজাৰ ৱৰ্কাৰ্ছ য়ুনিয়ন, নামৰূপ নামৰ সংগঠনটোৰ বেনাৰত ব্ৰহ্মপুত্ৰ ভেলী ফাৰ্টিলাইজাৰ কৰ্প’ৰেশ্যন লিমিটেডৰ প্ৰায় ৮০০ কৰ্মচাৰীয়ে প্ৰতিবাদী কাৰ্যসূচীত অংশগ্ৰহণ কৰি প্ৰতাৰণা দিৱস পালন কৰে।

উল্লেখ্য যে এসমত দেশৰ ভিতৰতে অধিকতম উৎপাদক্ষম সাৰ কাৰখানা হিচাপে জনাজাত নামৰূপৰ ব্ৰহ্মপুত্ৰ ভেলী ফাৰ্টিলাইজাৰ কৰ্প’ৰেশ্যন লিমিটেড শেহতীয়াভাৱে চৰম দুৰ্যোগপূৰ্ণ অৱস্থাৰ মাজেৰে কাৰ্যক্ষম হৈ আছে আৰু ইয়াৰ উৎপাদনশীলতা বহুত পৰিমাণে কমি গৈ আছে।

ব্ৰহ্মপুত্ৰ ভেলী ফাৰ্টিলাইজাৰ কৰ্প’ৰেশ্যন লিমিটেডৰ এগৰাকী নাম প্ৰকাশত অনিচ্ছুক বিষয়াই জনাইছে যে আশীৰ দশকৰে আওপুৰণি প্ৰযুক্তিৰে উৎপাদক চলাই থকা হেতুকে আয়তকৈ ব্যয়ৰ পৰিমাণ যথেষ্ট পৰিমাণে বৃদ্ধি পোৱাই কাৰখানাটোৰ এই অৱস্থাৰ কাৰণ। বিষয়াগৰাকীয়ে আৰু জানিবলৈ দিছে যে ২০০৬ চনতেই কেন্দ্ৰই আধুনিক প্ৰযুক্তি-সমৃদ্ধ চতুৰ্থটো উৎপাদনগোট স্থাপন কৰাৰ কথা আছিল যদিও এক অজ্ঞাত কাৰণত আজিকোপতি সেয়া হৈ নুঠিল।

নামৰূপ সাৰ ফাৰ্টিলাইজাৰ শ্ৰমিক য়ুনিয়ন এণ্ড ফাৰ্টিলাইজাৰ ৱৰ্কাৰ্ছ য়ুনিয়নৰ সম্পাদক তিলেশ্বৰ বৰাই আৰু কৈছে, ‘ব্ৰহ্মপুত্ৰ ভেলী ফাৰ্টিলাইজাৰ কৰ্প’ৰেশ্যন লিমিটেড হৈছে দেশৰ আটাইতকৈ প্ৰাচীন গেছ-ভিত্তিক সাৰ কাৰখানা যদিও ঘাইকৈ উৎপাদন হ্ৰাস পোৱা বাবেই এইটো বন্ধ কৰি দিবলগীয়া হ’ব। আমাৰ একমাত্ৰ আশা হৈছে এটা বিজুলী শক্তি ৰাহিকাৰী সৰ্বাধুনিক প্ৰযুক্তিযুক্ত উৎপাদন গোট স্থাপন কৰা।

উল্লেখ্য যে কেন্দ্ৰই নতুন গোট স্থাপন কৰি পৰ্যায়ক্ৰমে বৰ্তমানৰ গোটসমূহ বন্ধ কৰি দিয়াৰ প্ৰক্ৰিয়াটোত বিভিন্ন  বাধাৰ সৃষ্টি হৈ আহি আছে। নতুন গোটটো স্থাপন হোৱাত আৰু অধিক বিলম্ব হ’ব নালাগে। কেন্দ্ৰীয় চৰকাৰে ১২ বছৰৰ পূৰ্বেই সৰ্বাধুনিক  নামৰূপ-৪ নামৰ চতুৰ্থটো উৎপাদন গোট স্থাপন কৰি আওপুৰণি প্ৰযুক্তিৰ উৎপাদন গোটসমূহ বন্ধ কৰি দিয়াৰ প্ৰস্তাৱত অনুমোদন জনাইছিল। গতিকে কেন্দ্ৰীয় চৰকাৰ এই গোটটো স্থাপন কৰাৰ ক্ষেত্ৰত দায়বদ্ধ।

বৰাই আৰু কয়, ‘‘চৰকাৰে আমাক প্ৰতাৰণা কৰিছে।কাৰণ প্ৰতিশ্ৰুতি দিয়া সত্তেও চতুৰ্থটো উৎপাদন গোট স্থাপন কৰা নাই। নামৰূপ-২ আৰু নামৰূপ-৩ৰ অৱস্থা ভাল নহয় কাৰণ ইয়াৰে ৰাসায়নিক কাৰখানাটোৰ সামৰ্থ্য ১৫ বছৰৰ বাবেহে।

১৯৬৯ চনত স্থপন হোৱা ব্ৰহ্মপুত্ৰ ভেলী ফাৰ্টিলাইজাৰ কৰ্প’ৰেশ্যন লিমিটেড স্থাপন হৈছিল। আৰু সেয়েহে ইয়াৰ কাৰ্যক্ষমতা হ্ৰাস পাইছে। নামৰূপ-১, নামৰূপ-২ নামৰূপ-৩ৰ প্ৰযুক্তি আওপুৰণি হোৱা যোৱা বাবে অধিক শক্তিৰ প্ৰয়োজনীয় হোৱাৰ বাবে ইয়াৰ উপযোগিতা নোহোৱা হৈ আহিছে। ইতিমধ্যে নামৰূপ-১ক কৰ্তৃপক্ষই বন্ধ কৰি দিছে। বৰ্তমান এনে অৱস্থা পাইছেগৈ যে দুটা উৎপাদন গোটে সৰ্বোচ্চ ৫.৫৫ লাখ মেট্ৰিক টনৰ বিপৰীতে বছৰি মাত্ৰ ৩.৫ লাখ মেট্ৰিক টন ইউৰীয়াহে উৎপাদন কৰে।

উল্লেখ্য যে ২০১৫ৰ ২২ মে’ত ভাৰতৰ প্ৰধান মন্ত্ৰী নৰেন্দ্ৰ মোডীৰ অধ্যক্ষতাত বহা কেন্দ্ৰীয় কেবিনেটে ব্যক্তিগত-ৰাজহুৱা খণ্ডৰ অংশীদাৰিত্বত ৪,৫০০ কোটি টকা বিনিয়োগেৰে বাৰ্ষিক ৮.৬৪ লাখ মেট্ৰিক টন উৎপাদনক্ষম এমোনিয়া-ইউৰীয়া গোট এটা স্থাপন কৰাত অনুমোদন জনাইছিল।