জনপ্ৰিয় ভোজপুৰী গায়িকা, অসম-জীয়াৰী কল্পনা পাটোৱাৰীৰ বিজেপিত যোগদান
জনপ্ৰিয় ভোজপুৰী গায়িকা, অসম-জীয়াৰী কল্পনা পাটোৱাৰীয়ে আজি বিজেপিত যোগদান কৰিছে। আগন্তুক লোকসভা নিৰ্বাচনৰ প্ৰাকক্ষণত এই ঘটনাটোৱে বিশেষ তাৎপৰ্য্য বহন কৰিছে। ভোজপুৰী গায়িকা হিচাপে গোটেই ভাৰততে খ্যাতি অৰ্জা তথা ভোজপুৰী গীতকো প্ৰচুৰ খ্যাতি দিয়া কল্পনা পাটোৱাৰীয়ে আজি বিহাৰত বিজেপিৰ এখন সভাত দলটোৰ ৰাষ্ট্ৰীয় সভাপতি অমিত শ্বাহ, ৰাষ্ট্ৰীয় সাধাৰণ সম্পাদক ভূপেন্দ্ৰ যাদৱ, ৰবি শংকৰ প্ৰসাদ, বিহাৰৰ উপ মুখ্য মন্ত্ৰী সুশীল কুমাৰ যাদৱ আৰু অন্যান্য নেতাসকলৰ উপস্থিতিত দলটোত যোগদান কৰে।
কল্পনা পাটোৱাৰীয়ে বিজেপি দলটো আৰু মোদী কামকাজত আকৰ্ষিত হৈ দলটোত যোগদান কৰা বুলি সাংবাদিকক জানিবলৈ দিয়ে। তেওঁ দলৰ হৈ কাম কৰি যোৱাৰ ইচ্ছা প্ৰকাশ কৰে।
উল্লেখযোগ্য যে কল্পনা পাটোৱাৰী অসমৰ বৰপেটা জিলাৰ কন্যা হ’লেও বিশেষকৈ ভোজপুৰী সংগীত আৰু চিনেমা জগততে সৰ্বাধিক সময় দিছে আৰু তেওঁ ১০ হাজাৰৰো অধিক ভোজপুৰী গীতত কণ্ঠদান কৰিছে।
বিহাৰৰ লগতে ঝাৰখণ্ডৰো বহু অংশত কল্পনাৰ বিপুল জনপ্ৰিয়তা আছে। কল্পনাই ভোজপুৰী চিনেমাতো অভিনয় কৰিছে। তেওঁ ভোজপুৰী গীতৰ বাবে বহুতো পুৰস্কাৰো পাইছে।
আনহাতে অসমৰো সংগীত জগতত তেওঁৰ নাম পৰিচিত। কল্পনাৰ ৰাজনীতিত যোগদানে বিহাৰৰ লগতে অসমৰ ৰাজনৈতিক মহলতো চৰ্চা লাভ কৰিছে। অৱশ্য এই পৰ্য্যন্ত কল্পনাই অসমক নে বিহাৰক তেওঁৰ ৰাজনৈতিক কেৰিয়াৰৰ ক্ষেত্ৰ কৰিব জনোৱা নাই।