জাতিধ্বংসী নাগৰিকত্ব বিধেয়কৰ তীব্ৰ বিৰোধিতাৰে দেওধৰত কংগ্ৰেছৰ গণ স্বাক্ষৰ অভিযান
নাগৰিকত্ব সংশোধনী বিধেয়ক ২০১৬ৰ বাতিলৰ দাবীত নগাঁৱৰ দেওধৰত আজি কংগ্ৰেছে তীব্ৰ প্ৰতিবাদ সাব্যস্ত কৰাৰ লগতে হিন্দু বাংলাদেশীক ভাৰতীয় নাগৰিকত্ব প্ৰদানৰ বিৰুদ্ধে এক গণ স্বাক্ষৰ অভিযান কাৰ্যসূচী ৰূপায়ণ কৰে।
প্ৰায় সহস্ৰাধিক লোকে স্বাক্ষৰ প্ৰদান কৰা এই গণ স্বাক্ষৰ অভিযান কাৰ্যসূচীৰ শুভাৰম্ভ কৰে নগাঁও সদৰ সমষ্টিৰ প্ৰাক্তন বিধায়ক ডাঃ দুৰ্ল্লভ চমুৱাই।
এই কাৰ্যসূচীতে প্ৰাক্তন বিধায়কজনে বিজেপিৰ বিৰুদ্ধে সোচ্চাৰ হৈ মত প্ৰকাশ কৰে যে- ‘বিজেপি দলে জাতি-মাতি-ভেটি ৰক্ষাৰ নামত চৰকাৰ গঠন কৰিলেও চৰকাৰখনে অসমীয়াৰ ভৱিষ্যতৰ প্ৰতি ভাবুকি সৃষ্টি কৰি আহিছে। দলটোৱে জাতিধ্বংসী বিধেয়কখন আইনত পৰিণত কৰি হিন্দু বাংলাদেশীক নাগৰিকত্ব প্ৰদানেৰে ৰঙা দলিচা পাৰিব বিচাৰিছে। ইয়ে অসমীয়াৰ অস্তিত্বত আঘাত হানিব।’
‘অসমৰ অস্তিত্ব ৰক্ষাৰ বাবে ঐক্যবদ্ধ প্ৰচেষ্টাত স্বাক্ষৰ প্ৰদান কৰি আপুনিও অংশীদাৰ হওক’ শীৰ্ষক শ্লোগানক আধাৰ হিচাপে লোৱা গণ স্বাক্ষৰ অভিযান কাৰ্যসূচীত প্ৰাক্তন বিধায়কজনে সকলো জনসাধাৰণক এই কাৰ্যসূচীত অংশ গ্ৰহণ কৰিবলৈ আহ্বান কৰি তেওঁ আৰু কয়, ‘অসম আইৰ দুখত আমাৰ আদৰৰ ককাইদেউহঁতে হিয়া উজাৰি কান্দিছে। আইক ভাল পাওঁ বুলি বহি থাকিলে নহ’ব। জাত-পাত পৰিহাৰ কৰি সকলো ওলাই আহি প্ৰতিবাদ সাব্যস্ত কৰক।’
উল্লেখযোগ্য যে এই কাৰ্যসূচীত নগাঁও লোকসভা যুৱ কংগ্ৰেছ, পাখিমৰীয়া ব্লক যুৱ কংগ্ৰেছ, নগাঁও জিলা এন এছ ইউ আই, দেওধৰ মণ্ডল কংগ্ৰেছৰ নেতা-কৰ্মীও উপস্থিত আছিল।