পৰিৱৰ্তনৰ শ্ল’গানেৰে কেন্দ্ৰৰ লগতে ৰাজ্যত ক্ষমতাত অধিষ্ঠিত হৈছিল বিজেপি মিত্ৰজোট চৰকাৰ। কিন্তু বাস্তবত এতিয়াও ৰাইজে কোনোধৰণৰ পৰিৱৰ্তন প্ৰত্যক্ষ কৰা নাই। জৰাজীৰ্ণ বাট পথ, মৰণফাণ্ডত ,পৰিণত হোৱা দলঙসমূহে গভীৰ সমস্যাত পেলাইছে সৰ্বসাধাৰণ ৰাইজক।
ৰাজ্যৰ বিভিন্ন এলেকাৰ মাজত শোচনীয় পথ যোগাযোগে বাধাৰ সৃষ্টি কৰিছে জনসাধাৰণক। ঠিক সেইদৰে ডিব্ৰুগড় জিলাৰো অধিকাংশ বাট পথ জৰাজীৰ্ণ হোৱা বাবে ক্ষুব্ধ হৈ পৰিছে অঞ্চলবাসী। জিলাখনৰ মাধৱপুৰ, কঠালগুৰি আৰু টিংৰাই অঞ্চলৰ মাজৰ ৮ কিলোমিটাৰ পথৰ দুৰৱস্থাই জীয়াতু ভোগাইছে স্থানীয় অঞ্চলবাসীক।
‘দীৰ্ঘদিনৰ পৰা এই পথটো জৰাজীৰ্ণ ৰূপত আছে। অতি ব্যস্ত এই পথটোৰে বিভিন্ন সৰু-বৰ যান বাহন চলাচল কৰে। ৰোগীসকলে ডিব্ৰুগড় অসম চিকিৎসা মহাবিদ্যালয়লৈ চিকিৎসা গ্ৰহণৰ বাবে যাবলৈও এই পথটোৱে গুৰুত্বপূৰ্ণ ভূমিকা গ্ৰহণ কৰে’, এইদৰে একাংশ স্থানীয় লোকে নৰ্থ-ইষ্ট নাওক জানিবলৈ দিয়ে।
বিভিন্ন সময়ত স্থানীয় দল সংগঠনৰ সহযোগত উক্ত অঞ্চলৰ লোকসকলে পথটো মেৰামতিৰ বাবে প্ৰতিবাদ তথা চৰকাৰক দাবী জনাই আহিছে যদিও প্ৰশাসনে কোনো ব্যৱস্থা গ্ৰহণ নকৰা অভিযোগ উত্থাপন হৈছে।
ইফালে উক্ত পথটো অতি শীঘ্ৰে মেৰামতি কৰি দিবলৈ স্থানীয় সাংসদ তথা বিধায়কক অঞ্চলবাসীয়ে দাবী জনায়। অন্যথা ব্যাপক প্ৰতিবাদী কাৰ্যসূচী গঢ়ি তোলাৰ হুংকাৰ প্ৰদান কৰে।
