শিৱসাগৰ জিলাৰ ডিমৌত বহুদিনৰ পৰা এটা গৰু চোৰ চক্ৰই আতংকৰ সৃষ্টি কৰি আহিছিল। কিন্তু যোৱা নিশা ১২ বজাত হঠাৎ এখন ইণ্ডিকা গাড়ী খালত সোমোৱাৰ লগে লগে ডিমৌৰ চুকাফা নগৰত হুৱাদুৱাৰ সৃষ্টি হয় আৰু উদ্ধাৰ হয় তিনিটাকৈ চুৰি গৰু।
জানিব পৰা মতে AS-01BE-0740 নম্বৰৰ এখন বগা ৰঙৰ ইণ্ডিকা ভিছ্টা বাহনত অহা চাৰিটা গৰু চোৰে নিশা প্ৰায় ১২ বজাত ডিমৌৰ চুকাফা নগৰৰ পৰা তিনিটাকৈ গৰু চুৰ কৰি গাড়ী খনত ভৰাই লয়। কিন্তু দুৰ্ভাগ্যক্ৰমে এই গৰুভৰ্তি এই বাহনখন এটা খালত পৰি লাগি ধৰে।
গাড়ীখন খালৰ পৰা উঠাবলৈ চেষ্টা কৰি থাকোতেই গাড়ীৰ শব্দত ওচৰ পাজৰৰ মানুহ সাৰ পাই ওলাই আহে। মানুহবোৰক দেখি চোৰকেইটাই ওচৰৰ বাগানৰ ফালে লৰ মাৰি পলায়ন কৰে।
স্থানীয় ৰাইজে লগে লগে ডিমৌ আৰক্ষী চকীলৈ খৱৰ দিয়ে আৰু আৰক্ষীয়ে ইণ্ডিকা গাড়ী খন জব্দ কৰে। গাড়ীখন পঞ্জীয়নৰ পৰা সেইখন কামৰূপৰ ৰাজেশ কুমাৰ সিঙৰ বুলি জানিব পৰা গৈছে।
আৰক্ষীয়ে বহু সময় চোৰ কেইটাক বিচাৰে যদিও এটাকো আটক কৰিবলৈ সক্ষম নহ’ল। স্থানীয় ৰাইজৰ মতে দীৰ্ঘদিন ধৰি এটা বৃহৎ চক্ৰই ডিমৌৰ বিভিন্ন অঞ্চলত এনেদৰে গৰু চুৰি কাৰ্য সংঘটিত কৰি আহিছে। গৰু চোৰে এনেদৰে যাত্ৰীবাহী বাহনত উঠাই অতি কৌশলেৰে জনবসতি এলেকাৰ মাজেৰে গৰু পাৰ কৰি নিয়ে। ঘটনাটোৱে আজি অঞ্চলটোৰ সৰ্বত্ৰে প্ৰতিক্ৰিয়াৰ সৃষ্টি কৰিছে।
ইয়াৰ আগতেও ডিমৌৰ বিভিন্ন অঞ্চলৰ পৰা এনেদৰে গাড়ীত গৰু উঠাই লৈ যোৱা বহুজনে প্ৰত্যক্ষ কৰিছে। ডিমৌ চুকাফা নগৰৰ স্থানীয় নিবাসী সকলৰ মতে সদায় ৰাতি উক্ত ৰাস্তাটোৱেদি বিভিন্ন ধৰণৰ বেআইনী কাম সংঘটিত হৈ আহিছে। চুকাফা নগৰৰ পথত এটা আৰক্ষী চেক প’ষ্ট বহুৱাবলৈ দাবী জনাইছে স্থানীয় ৰাইজে।
