ত্ৰিপুৰা বিধানসভা নিৰ্বাচন প্ৰক্ৰিয়াত নিয়োজিত চৰকাৰী বিষয়া-কৰ্মচাৰীসকলে দেওবাৰে ধৰ্মনগৰ ছোৱালী উচ্চতৰ মাধ্যমিক বিদ্যালয়ত ডাক বেলট যোগে নিজৰ নিজৰ ভোটদান সাব্যস্ত কৰে।
নিৰ্বাচন প্ৰক্ৰিয়াত নিয়োজিত চৰকাৰী বিষয়া কৰ্মচাৰীসকলে নিজৰ নিজৰ ভোটদান সাব্যস্ত কৰিব পাৰিব ১০ৰ পৰা ১৪ ফেব্ৰুৱাৰিৰ ভিতৰত। নিৰ্বাচনত নিয়োজিত এই সকল বিষয়া-কৰ্মচাৰীয়ে কেৱল নিজৰ নিজৰ উপ দণ্ডাধীশ বিভাগীয় কাৰ্যালয়ত ডাক বেলট যোগে ভোটদান সাব্যস্ত কৰিব পাৰিব।
উল্লেখযোগ্য যে যোৱা শনিবাৰে ৰাজ্যখনৰ ১২ টা কেন্দ্ৰত আৰক্ষী আৰু পেৰামিলিটেৰী বাহিনীৰ লোক সকলে ডাক বেলটৰ সহায়ত নিজৰ ভোটাধিকাৰ সাব্যস্ত কৰিবলৈ সক্ষম হয়।
ৰাজ্যখনৰ বিভিন্ন ঠাইত অনুষ্ঠিত হৈ থকা ডাক বেলট ভোট প্ৰক্ৰিয়াত যাতে কোনো ধৰণৰ অপ্ৰীতিকৰ পৰিস্থিতৰ উদ্ভৱ নহয় তাৰ প্ৰতি লক্ষ্য ৰাখি সুৰক্ষা বাহিনীক অধিক শক্তিশালী ৰূপত মোতায়েন কৰা হোৱা বুলিও জানিব পৰা গৈছে।
ভোটদান সাব্যস্ত কৰা কৰ্মচাৰী সকলৰ মাজত যথেষ্ট উৎসাহ দেখা পোৱা পৰিলক্ষিত হৈছে। ৰাজ্যিক কৰ্মচাৰী সকলে চলো পাল্টাই শ্লোগানৰ বিপৰীতে চলো বেতন বৃদ্ধি শ্লোগান আওৰোৱা দেখিবলৈ পোৱা যায়।
স্মৰ্তব্য যে ৬০ টা সমষ্টিৰে পৰিপূৰ্ণ ত্ৰিপুৰা বিধানসভা নিৰ্বাচন ফেব্ৰুৱাৰিৰ ১৮ তাৰিখে অনুষ্ঠিত হ’ব আৰু নিৰ্বাচনৰ ফলাফল ৩ মাৰ্চৰ দিনা ঘোষণা কৰা হ’ব।
