নিচাজাতীয় সামগ্ৰী বিৰোধী অভিযানত পুনৰ সফলতা ত্ৰিপুৰা আৰক্ষীৰ। দেওবাৰে টেলিয়ামূৰা মহকুমা আৰক্ষী বিষয়া তাপস দেৱৰ নেতৃত্বত যোৱা এটা আৰক্ষীৰ দলে ৰাষ্ট্ৰীয় ঘাইপথৰ পৰা বৃহৎ পৰিমাণৰ নিচাজাতীয় সামগ্ৰী ভাং জব্দ কৰে। ৰাজ্যৰ বাহিৰৰ পৰা ত্ৰিপুৰাত অবৈধভাৱে ব্যৱসায় কৰিবলৈ অনা বৃহৎ পৰিমানৰ ভাংখিনি ২০ টা পেকেটত আছিল।
এক গোপন সূত্ৰৰ পম খেদি আৰক্ষীৰ দলটোৱে চলোৱা অভিযানত আঠাৰামুৰাৰ সমীপৰ ৪৪ নম্বৰ ৰাষ্ট্ৰীয় ঘাইপথৰ কাষৰ পৰা এখন গাড়ীত মজুত কৰি ৰখা অৱস্থাতে ভাংখিনি জব্দ কৰিবলৈ সক্ষম হয়।
লক্ষ্যণীয়ভাৱে আৰক্ষীৰ উপস্থিতিৰ উমান পাই নিচাজাতীয় সামগ্ৰী ভাংখিনিৰ সৰবৰাহকাৰী কেইজনে ঘাইপথৰ ওচৰতে ভাংখিনি এৰি ঘটনাস্থলীৰ পৰা পলায়ন কৰে। আৰক্ষীয়ে ঘটনাস্থলীৰ পৰা মুঠ ৩৬৫ কিলোগ্ৰাম ভাং জব্দ কৰে যদিও সৰবৰাহৰ লগত জড়িত এজনো লোকক গ্ৰেপ্তাৰ কৰিব নোৱাৰিলে।
আৰক্ষীৰ এই সফলতাৰ পাছত সাংবাদিকক অভিযান সন্দৰ্ভত জানিবলৈ দি কয় যে আৰক্ষীয়ে নিচাজাতীয় সামগ্ৰীখিনিৰ বিৰুদ্ধে অভিযান চলোৱা বুলি সৰবৰাহকাৰী কেইজনে জানিছিল। সেয়ে সিহতে ভাংখিনি গাড়ীতে এৰি পলায়ন কৰে। ইফালে সৰবৰাহকাৰী কেইজনক আটক কৰিবলৈ আৰক্ষীয়ে অভিযান অব্যাহত ৰখা বুলিও জানিবলৈ দিয়ে।
