অহা ১৮ মাৰ্চত ভাৰতীয় জনতা পাৰ্টীৰ (বিজেপি) ৰাষ্ট্ৰীয় সম্পাদক ৰাম মাধৱ দলৰ বিশেষ কাৰ্যক্ৰমনিকাৰ বাবে উপস্থিত হ’ব ত্ৰিপুৰাত।
উল্লেখ্য যে ত্ৰিপুৰা ৰাজ্যিক বিজেপিৰ সভাপতি বিপ্লব কুমাৰ দেৱ মুখ্য মন্ত্ৰীৰূপে শপত লোৱাৰ পাছৰ পৰাই ৰাজ্যিক বিজেপিৰ সভাপতি পদটো খালী হৈ পৰে। যাৰ ফলত দলীয় কাম-কাজত কিছু অসুবিধাৰ সন্মুখীন হোৱা পৰিলক্ষিত হৈছে।
ইয়াৰ উপৰি দলৰ অন্য শীৰ্ষ পৰ্যায়ৰ নেতাসকলো বিভিন্ন কেবিনেট মন্ত্ৰীৰ দায়িত্ব লোৱা হেতুকে নতুন সভাপতি নিৰ্বাচন কৰাত বিভিন্ন অসুবিধাৰ সন্মুখীন হৈছে কেন্দ্ৰীয় নেতৃবৃন্দ।
সেয়ে কেন্দ্ৰীয় নেতৃত্বই ৰাষ্ট্ৰীয় সম্পাদকগৰাকীক ৰাজ্যখনৰ পৰৱৰ্তী সভাপতি নিয়োগ কৰাৰ উদ্দেশ্যে ত্ৰিপুৰালৈ প্ৰেৰণ কৰাৰ সিদ্ধান্ত গ্ৰহণ কৰিছে। আৰু সম্পাদকগৰাকীয়ে ৰাজ্যত উপস্থিত হৈ শীৰ্ষ পৰ্যায়ৰ নেতাসকলৰ লগত এলানি আলোচনাত অংশ লোৱাৰ উদ্দেশ্যে ৰাজ্যখনলৈ আহিব।
ত্ৰিপুৰা বিজেপিৰ ৰাজ্যিক সভাপতি নিয়োগ কৰাৰ দৰে কঠিন কাম হাতত লৈয়ে তেওঁ ৰাজ্যখনলৈ ১৮ মাৰ্চত আহিব। ইয়াৰ উপৰি তেওঁ বিভিন্ন দলীয় আলোচনাতো অংশ ল’ব বুলি জানিব পৰা গৈছে।
স্মৰ্তব্য যে বিজেপি দলে অহা ছয় মাহলৈ কোনো নতুন সদস্যক দলীয় কাম কাজত নিয়োগ নকৰিবলৈ ৰাজ্যিক সমিতিক নিৰ্দেশ জাৰি কৰি থৈছে।
এক বিশেষ সূত্ৰৰ পৰা জানিব পৰা গৈছে যে আগৰতলালৈ চমু ভ্ৰমণসূচী লৈ আহিব লগীয়া সম্পাদক ৰাম মাধৱ কেবিনেট মন্ত্ৰীসকলৰ লগতো গুৰুত্বপূৰ্ণ আলোচনাত মিলিত হ’ব। কিয়নো ত্ৰিপুৰা চৰকাৰৰ মন্ত্ৰীসকল একেবাৰে নতুন সেয়ে কোনো বেমেজালি উৎপত্তি নোহোৱাকৈ যাতে সঠিক ৰূপত চৰকাৰী কাম-কাজ পৰিচালনা হয় তাৰ বাবে কিছু পৰামৰ্শ আগবঢ়াব।
আনহাতে নতুন চৰকাৰৰ কাম-কাজ সম্পৰ্কে পৰ্যালোচনা কৰা তথা পৰামৰ্শ দিয়াৰ উদ্দেশ্যে ভৱিষ্যতলৈ আৰু কেন্দ্ৰীয় নেতা ৰাজ্যলৈ আহিব বুলিও শুত্ৰটোৱে প্ৰকাশ কৰিছে।
