দিচপুৰ আৰক্ষীৰ জালত ভুৱা নথি-পত্ৰ জমা দি গাড়ী ক্ৰয় কৰা প্ৰবঞ্চক
গুৱাহাটীৰ গণেশগুৰিস্থিত মুকেশ হুইণ্ডাৰ ডিলাৰৰ পৰা অচিনাক্ত ব্যক্তিৰ নথি-পত্ৰ দি গাড়ী ক্ৰয় কৰা এজন যুৱক আজি দিছপুৰ আৰক্ষীৰ জালত পৰে। ধৃত লোকজনৰ নাম বিশ্বজিৎ গগৈ ওৰফে কিশোৰ বৰুৱা।
দিচপুৰ আৰক্ষীৰ এক সূত্ৰই নৰ্থ-ইষ্ট নাওক জানিবলৈ দিয়া মতে ২৬ ফেব্ৰুৱাৰিৰ দিনা ডিলাৰৰ সহকাৰী সাধাৰণ পৰিচালক ধীৰাজ দাসে ৫২৬/১৮ নং আৰু ভাৰতীয় দণ্ডবিধিৰ ৪০৬/৪২০/৪৬৮ ধাৰাত এক গোচৰ তৰিছিল।
উক্ত গোচৰৰ ভিত্তিত আৰক্ষীয়ে অভিযান চলাই ইতিমধ্যে ৰাজু বৰা ওৰফে বুদ্ধেশ্বৰ সোণোৱাল নামৰ এজন লোকক গ্ৰেপ্তাৰ কৰি জে’ললৈ প্ৰেৰণ কৰিছিল যদিও ঘটনাটোৰ মুল অভিযুক্ত বিশ্বজিৎ গগৈ পলাতক অবস্থাত আছিল।
উল্লেখযোগ্য যে ২০১৭ চনৰ জুলাইত বিশ্বজিৎ গগৈয়ে বুদ্ধেশ্বৰ সোণোৱাল নামৰ এজন লোকক স্বাক্ষী হিচাপে লৈ মুকেশ হুইণ্ডাৰ ডিলাৰৰ পৰা অচিনাক্ত কিশোৰ বৰুৱাৰ নামত নথি পত্ৰ প্ৰদান কৰি এখন গ্ৰেণ্ড আই ১০ কাৰ ক্ৰয় কৰিছিল বুলি আৰক্ষীৰ সূত্ৰটোৱে জানিবলৈ দিয়ে।
লোকজনে কিশোৰ বৰুৱাৰ নামত ভুৱা ভোটাৰ পৰিচয় পত্ৰ, পান কাৰ্ড, কাৰেন্টৰ বিল আদি ডিলাৰটোক জমা দিছিল বুলি জানিবলৈ দি দিচপুৰ আৰক্ষীয়ে লগতে কয় যে তেওঁ উক্ত ডিলাৰটোক ১ লাখ ২০ হাজাৰ টকা আগধন হিচাপে আদায় কৰিছিল যদিও পিছৰ মাহৰ পৰা কোনো কিষ্টি প্ৰদান কৰা নাছিল।
এক গোপন সূত্ৰৰ ভিত্তিত দিচপুৰ আৰক্ষীৰ এটা দলে ডিব্ৰুগড় আৰক্ষীৰ সহায়ত অভিযান চলাই গদাপানি তিনিআলিৰ পৰা দেওবাৰে নিশা ১০:৩০ বজাত বিশ্বজিতক আটক কৰি আজি পুৱাই দিচপুৰ থানাত হাজিৰ কৰায়।
আৰক্ষীয়ে জনোৱা অনুসৰি ধৃত বিশ্বজিতে গাড়ীখন নাগালেণ্ডত নি ২ লাখ ৬৬ হাজাৰ টকাত বিক্ৰী কৰে বুলি স্বীকাৰ কৰে। অধিক তথ্যৰ বাবে অহা ৪ মে লৈকে তেওঁক দিছপুৰ আৰক্ষীৰ জিম্মাত ৰখা হ’ব বুলি আৰক্ষীয়ে লগতে জানিবলৈ দিয়ে।